Eureka! Zientzia Museoak 2026an itxiko ditu ateak, eta Tabakalerak hartuko du horren lekukoa

Eureka! Zientzia Museoak 2026ko bigarren seihilekoan itxiko ditu ateak, eta Tabakalerak jarraipena emango dio horren ondareari urte horretako udazkenetik aurrera. Kutxa Fundazioak martxan jarriko duen espazio berriak 'Atenea' izango du izena. Horren helburu nagusia sormena eta ezagutza artistiko, zientifiko eta humanistikoa sustatzea izango da, eta, aldi berean, pentsamendu kritikoa eta ahalduntze soziala bultzatzea.

Gauzak horrela, herritarren arteko harremanak sustatzeko lekua izango da, ezagutza, berrikuntza eta sorkuntza sustatuz, gizarte sortzaileago eta iraunkorrago baten mesedetan. 'Atenea' guneak STEAM ezagutzaren transmisioa ere sustatuko du, baita arte eta gizarte zientziena ere, hausnarketa eta pentsamendu kritikoa ikuspegi inklusibo eta parte-hartzailetik bultzatuz.

"Jakin-minaren giltza erabiliko du esperimentazioari, partekatutako ideiei, sormenari eta berrikuntzari bide emateko", azpimarratu du Ander Aizpurua Kutxa Fundazioko zuzendari nagusiak. "Espazio bizi eta publiko horretan, erakusketa, jarduera, programa eta hainbat adierazpen publikoren bidez, pentsamendu kritikoa, hausnarketa, eztabaida eta ezagutza esanguratsuaren elkartruke kolektiboa sustatuko dira", gaineratu du.

Hain zuzen ere, Tabakalerako 0, 1 eta 4. solairuetan egongo da espazio berri hori, 6.300 metro karratuko azalerarekin, eta erakusketarako, inspiraziorako, prestakuntzarako eta elkarlanerako espazioak izango ditu. Eraldaketa soziala bultzatzeko hainbat gune, Tabakalerak sorkuntza artistiko eta kulturaleko fabrika gisa eskaintzen duen eskaintza osatzeko eta aberasteko.

"Ezagutzari, espazio eta esperientzia desberdinei, jakin-minari eta sormenezko esperimentazioari omenaldia egiteko balioko du. Adimenaren forma guztiak sustatzen eta zabaltzen dituen lekua, pertsonak ahaldunduz eta sustatuz. Pentsamendu hibridoa, ezagutza publikoa, ideia elkarrizketatua eta jakin-min aseezina oda bat", adierazi du Karmele Gomez Kutxa Fundazioko Berrikuntza zuzendariak.

Horrenbestez, Tabakaleran bertan txertatutako 'Atenea' espazioak zentro horren balio-proposamena aberasten eta Kultura Garaikidearen Nazioarteko Zentro gisa duen posizionamendua indartzen lagundu nahi du.