Gabonetako Loteriak 2.240 milioi euro banatuko ditu aurten

Pasaden urtean bezala, Gabonetako Loteriak 2.240 miloi euro banatuko ditu datorren abenduaren 22an, Inmaculada Garcia Estatuko Loteria eta Apustuen zuzendariak azaldu duenez.

Sari nagusiak 640 milioi euro banatuko ditu guztira, eta, dezimo bakoitzak 400.000 euro jasoko ditu. Loteriako bigarren sariak 1,25 milioi euro banatuko ditu serie bakoitzeko, eta hirugarrenak 500.000 euro. Laugarren saria 200.000 eurorekin sarituta dago, eta, bosgarrena, 60.000 eurorekin.

Horrela gauzak, sari nagusiko irabazleek 20.000 euro lortuko dituzte jarritako euro bakoitzeko. Bigarren sariko garaileek, 6.250 euro, eta hirugarrenekoek, 2.500 euro. Halaber, laugarren sariko irabazleek 1.000 euro eskuratuko dituzte, eta bosgarrena dutenek, 300 euro.

EAEko biztanleek 74,84 euroko gastua egingo dute batez beste, eta Nafarroan, aldiz, pertsona bakoitzak 55,08 euro inbertituko ditu.

Iragarkia

Bestalde, Gabonetako Loteriaren aurtengo iragarkiak iazko leloa errepikatuko du: ‘Sari nagusia partekatzea da’. Gainera, lehen aldiz, animaziozko laburmetrai batek iragarriko du aurtengo loteria. Inmaculada Garciaren esanetan, “ontasunean, zintzotasunean eta detaile txikien handikortasunean datza” iragarkia, horiek baitira gizakion alde positiboa erakusten duten gauzak.

Pertsonai nagusiak Justino du izena, eta manikien fabrika batean lan egiten duen gauzain bat da. Egunero goizeko txandan lan egiten duten lankideak harritzen ditu, baina, egun batean, beraiek txundituko dute Justino.