Aurrerapena
Enkore taldea ikusiko dugu gaur 'Goenkale'n
Talde bilbotarrak Atxuri tabernan emanaldia eskainiko du, gaur 22:00etan, ETB-1en.
Your browser doesn’t support HTML5 video
Enkore 'Goenkale'n ikusi eta entzungo dugu gaur, 22:00etan, ETB-1en. Gaztea irratiaren XX. Maketa Lehiaketa irabazi zuen Bilboko talde gazteak bere diskoko hainbat kantu eskainiko dituzte Arraldeko Atxuri tabernan.
Horrez gain, ETB-1eko telesailaren atal honetan hainbat gertaera izango dira. Asunek Luisen gorpua lurperatzea erabakiko du. Sabinok nahiago du poliziarengana joatea, eta euren buruak defendatzeko hil dutela aitortzea, baina, beste behin ere, Asunek bere irizpidea Sabinorenaren gainetik jarriko du, eta gorpua ezkutatu egingo dute. Sabino ez dago lasai, eta, gainera, sekretu horrek Garbiñerekin daukan harremana gehiago okertuko du.
Garbiñek Lupe izango du une garratz horietarako lagun. Azken hori, baina, ez dabil behar bezain lasai, Jessik, alaba menderakaitzak, keztatuta baitauka. Ama-alabak euren herrialdera bidaiatzekotan dira, baina, aurretik, Jessik Atxurin egingo duten festara joan nahi izango du, Saidi bere sentimenduak adierazteko. Alabaina, jaia drama bihurtuko da.
Inesek moja izateari uzteko erabakia hartu du, Germanekin izandako harremanaren ostean, haurdun gelditu baitzen. Gizonak, ordea, ez du horren berririk, eta beste maitasun harreman bati ekingo dio, Mireiarekin, hain zuzen ere.