Zuzeneko kirol emanaldiak
Estropadak Zumaiatik eta pilota Bastidatik, igandean, ETB1en
A.A.
EiTB
Harrizulatzaileen binakako txapelketako finala ere eskainiko da.
Zuzeneko bi kirol emanaldi osatuko ditu ETB1ek igandean. Lehendabizikoa, eguerdiko 12etan, Euskotren eta San Miguel ligetako estropadak. El Diario Vasco Bandera eta Zumaiako Ikurrina izango dituzte jokoan, hurrenez hurren, Zumaian. Mikel Olazabalek eta Ibon Gaztañazpik egingo dute kontakizuna, eta Amane Ibañezek elkarrizketak.
17:00etan Bastidara joko dute pilota emankizuna egiteko. Xabier Euzkitze, Joxan Tolosa eta Elena Azpeitiaren eskutik, bi partidaz gozatzeko parada izango da: Rico IV-Iza / Victor-Untoria eta Olaizola II-Ibai Zabala / Titin III-Albisu.
Bi kirol hitzorduak zuzenean jarraitu ahal izango dira eitb.com-eko streaming-aren bitartez.
Bestalde, ETB1ek herri kirolen tartea zabalduko du 16:10ean, harrizulatzaileen binakako txapelketako finala eskaintzeko. Iñigo Aiestaranek, Mario Ronco aditua lagun duela, hilaren 21an Bilbon jokatutako probaren berri emango du.