'El jardinero fiel' pelikula saritua, gaur gauean, ETB2n

Gaur gauean, 22:15ean, El jardinero fiel filma emitituko da ETB2n, 22:15ean. Intriga, drama eta thrillerra batzen dituen film honek kritina onak eta sari ugari jaso zituen. Rachel Weisz eta Ralph Fiennes aktoreak dira protagonistak.

Kenya iparraldeko txoko batean, aktibista bat hilda agertuko da. Aktibista hori Tessa Quayle (Rachel Weisz) da eta hilketaren momentuan bertako mediku batekin dago. Medikuaren gorpua ez dago hilketaren lekuan eta amodiozko krimen bat izan daitekeelaren teoria zabaltzen da.

Justin Quayle (Ralph Fiennes) Tessaren senarra da eta britainiar diplomatikoa. Bere emaztea hiltzen denean, bien arteko fideltasun faltaren zurrumurruak direla medio eta iraganean bizitako momentu onak gogoratu ostean, Tessaren hilketaren inguruan ikertzen hastea erabakiko du Justinek. Horretarako, bere emaztea ikertzen ari zen kasuan bete-betean sartuko da eta errugabeak diren pertsonen hilketak burutzen dituen enpresa farmazeutiko batekin egingo du topo. Ondorioz, bere emazteak hainbeste denboran salatu duen ustelkeria eta giza eskubideen urraketa burutzen dituen enpresa hau ixtea nahiko du Justinek eta horretarako, bere bizitza ere arriskuan jarri beharko du.