Sugegorriak, azpijokoak eta Guaranien jantziak, 'Conquistador' saioan

Gaur gauean, 22:00ak aldera, 'El Conquistador Del Fin Del Mundo' saioaren hirugarren atala izango dugu ikusgai, eta sugegorriak, azpijokoak eta Guaranien jantziak izango ditugu ardatz.

Hasteko, Yacaré taldeko kideek, berriz ere, Guaranen kanpalekuko arauak urratuko dituzte. Izango al dute zigorrik? León izan da 'chiripá'rekin soilik estalita lo egin duen bakarra. Gainerako kideek ez dute iragan asteko lezioa ikasi, eta, Michelek bezala, etxerako bidea har dezakete.

Manuren taldeak Juanitoren, Kortaren eta gainontzekoen isekak jasan beharko dituzte, Inmunitate Jokora erdi-biluzik joan direlako. Baina Juanito ohartuko da eurak izan daitezkeela horrela janzten hurrengoak, eta trufak berehala amaituko dira.

Jokoan, taldeek palmondo bat  bota beharko dute aihotza erabilita, eta, oihanean barrena eraman beharko dute ikurrina dagoen lekuraino. Proba garrantzitsua da, eta hori dela eta, lehiaketako lehen azpijokoa ikusiko dugu, Jose Luis Kortaren eskutik.

Bestalde, Iguazuko oihana hautaketa naturala egiten hasiko da, Argentinako eremu horretan dauden suge pozoitsuen bidez. Rebeka erietxean da eta, sugegorri baten haginkadaren ondorioz, haren partehartzea kolokan izan daiteke. Ez da, ordea, medikua beharko duen bakarra. Amaia Puertasek nerbio-krisialdia izango du Jokoaren ostean.

Gaur, gaueko Teleberriaren ostean, ETB2n izango dugu ikusgai 'El Conquistador Del Fin Del Mundo' saioaren atal berria.