Saskibaloia, pilota eta herri kirolak, EiTBko kirol eskaintza

Kirol eskaintza betea dakar EiTBk gaurko. Saskibaloia, pilota eta herri kirol emanaldiak egingo dira, eta 22. futbol jardunaldiaren errepaso zabala ere bai.

Bi saskibaloi partida izango dira ikusgai: Cai Zaragoza-Bilbao Basket, 12:15ean, ETB1en, eta Herbalife G. Canaria-Laboral Kutxa, 13:15ean, ETBKn. Asier Aranguren eta Josean Aldalur batetik, eta Xabier de la Fuente eta Aitor Uriondo bestetik, izango dira esatariak. Biak eitb.com-en ere jarraitu ahal izango dira.

16:00etan, ETB1en, herri kirolen tartea zabalduko dute, urtarrilaren 26an Iraetan jokatutako Errota Harria eskaintzeko. Koldo Aldalurrek egingo du kontaketa.

Jarraian, pilota emankizuna hasiko da zuzenean Logroñoko Adarragatik. Hiru partidak osatuko dute jaialdia: Victor-Untoria / Jaka-Rezusta, Titin III-Merino II / Xala-Zubieta eta Mendizabal III-Tolosa / Tainta-Mendizabal II. Atariko partida eta neurketa nagusia, txapelketakoa, ETB1en izango dira ikusgai, eta hirugarrena, berriz, ETBKn. Jaialdi osoa eitb.com-en emango da. Kontakizunaren arduradunak, ohi denez, Xabier Euzkitze, Joxan Tolosa eta Elena Azpeitia izango dira.

Futbolari eskainitako 'Gol Festa' saioak bi edizio izango ditu igande honetan ETB1en, 19:30ean eta 22:50ean. Iluntzean jardunaldiaren azterketa egingo dute hasteko, eta Realak  At. Madrilen aurka Vicente Calderonen jokatuko duen partidari erreparatuko diote geroxeago, 20:45ak aldera. Gauekoa, berriz, Athletic-Real Madril neurketari eskainia egongo da. Mikel Olazabal izango du gidari saioak.

Azkenik, 20:30ean, ETBKn, Munduko Pala Txapelketako finalerdia izango da ikusgai: Gaubeka eta Garcia nor baino nor gehiago. Iñigo Aiestaranek eta Iñigo Oiartzabalek egingo dute kontakizuna.