Eibar futbol taldeari jarraipen berezia, ETB1en eta eitb.com-en

Eibar futbol taldeak bizi duen momentu gozoarekin bat eginez, Euskal Telebistak, gaur Mirandesen aurka jokatuko duen partida zuzenean eskaintzeaz gain, 'Eibar Primeran!' erreportajea emitituko du. Armaginak Bigarren Mailako lehen postuan dira eta Lehen Mailara igotzeko aukerak dituzte. Horrek herrian piztu duen ikusmin eta ilusioa bilduko du saio berezi honek.

Denboraldi bikaina osatzen ari da Eibar. Liga amaitzeko 12 jardunaldiren faltan, sailkapen buru dira, eta lidergoari eustea dute helburu. Honenbestez, larunbat honetan, Mirandesen aurka, garaipenaren bila aterako dira. Bertan gertatzen denaren zuzeneko kontakizuna egingo dute Anduva futbol zelaitik bertatik Naxari Altunak, Juanan Larragañak eta Joseba Urkiolak arratsaldeko seietatik aurrera. Partida amaitutakoan, protagonisten hitzak bilduko dituzte eta prentsaurrekoak eskainiko dituzte.

20:30ean 'Gaur Egun' albistegia eta eguraldiaren iragarpena izango dira ikusgai, eta segidan, 'Eibar, Primeran!' erreportajea eskainiko da.

Talde barruan bizi den giroaz mintzatuko dira Gaizka Garitano entrenatzailearekin, eta Jon Errasti, Jota Peleteiro eta Mikel Arruabarrena jokalariekin. Alex Aranzabal presidenteak ere parte hartuko du.

Eibar taldearekin harremana izan duten futbolarien testigantzak ere bilduko dituzte. Xabi Alonso Real Madrileko jokalaria dugu horietako bat. Realeko lehen taldean hasi berria zela, Eibarrera joan zen utzita.

Gaizka Toquero eta Gorka Iraizoz Athleticeko jokalariak Eibarren aritutakoak dira baita ere. Markel Susaetak, eibartarra den arren, ez du herriko taldean jokatu.

Jagoba Arrasate Realeko entrenatzailea, eta Markel Bergara eta David Zurutuza jokalariak bertatik pasatakoak dira. Egun txuriurdinen teknikaria den Javi Perez, berriz, Eibarko kirol zuzendari izan zen.

Kontakizun bilduma osatzeko, Jose Eulogio Garate, Joseba Llorente, Luluaga, Jose Ignacio Garmendia eta Iñaki Altuna futbolari ohiekin, Miguel de Los Toyos herriko alkatearekin, Oskar Trebiño sukaldariarekin eta Antxon Urrosolo kazetariarekin izango dira.

Futbol taldearen ibilbideko pasarte garrantzitsuak gogora ekartzearekin batera, une hau nola bizi duten galdetuko diete herritarrei.

Ana Ramos ETBko kirol kazetariak gidatuko du 'Eibar Primeran!' erreportajea ETB1en eta eitb.com-en.

Sestao-Peña Sport zuzenean eta Athletic-Getafe partidaren laburpena

'Zilarrezko Futbola' tartearen barruan, Bigarren B Mailako Sestao-Peña Sport partida ere eskainiko da arratsaldeko lauretatik aurrera. Xabier Andueza eta Jose Luis Ribera izango dira esatariak.

Amaitzeko, 23:50ean 'Gol Festa' saio berezia gidatuko du Jon Elortzak, Athleticek eta Getafek San Mamesen jokatuko duten neurketaren laburpena eta azterketa eskaintzeko.

Bi futbol partidak eta erreportajea eitb.com-en ikusgai izango dira streaming bidez.