Saskibaloia, txirrindularitza eta pilota, gaur, zuzenean

Kirol eskaintza bete betea dakarte Euskal Telebistak eta eitb.com-ek gaur. Saskibaloiari dagokionez, Endesa Ligako 33. jardunaldiko partida eta Final Fourreko finala eta ¾. posturako partidak eskainiko dira telebista zein internet bidez. Horrez gain, Italiako Giroko 9. etapa eta Barriolaren eta Xalaren arteko buruz burukoa.

ETB1en, 12:15ean dugu lehen hitzordua: Endesa Ligako Cai Zaragoza-Laboral Kutxa neurketa, Asier Arangurenen eta Josean Aldalurren kontakizunarekin.

15:00etan, Italiako Giroko 9. etaparen emankizuna hasiko da, Fermin Aramendiren eta Xabier Usabiagaren eskutik. Bigarren egunez jarraian, maldan gora amaituko den etapari egin beharko diete aurre txirrindulariek.

Lasterketa amaitzean, 17:15ak aldera, hasiko da 'ETB Kantxa' saioa, Eibarko Astelenatik. Titin III-Tolosa / Aritz Lasa-Merino II partidak zabalduko du jaialdia eta ondoren, Barriola eta Xalaren arteko buruz burukoa jokatuko da. Hirugarrena ere txapelketakoa izango da, Tainta eta Jakaren artean, eta eitb.com-en bakarrik izango da ikusgai.

Bestalde, ETBKn, Euroligako Final Fourreko azken bi partidak izango dira ikusgai, Asier Arangurenen eta Josean Aldalurren kontakizunarekin: 17:00etan ¾. postua erabakiko duena eta 20:00etan finala.

Ohi denez, 19:30ean hasiko da 'Gol Festa' saioa, Mikel Olazabalek gidatuta. Ligako azken jardunaldiaren errepasoa egingo dute eta euskal taldeen emaitzei erreparatuko diete bereziki.

ETBKn beste hiru emanaldi izango dira: 12:00etan, palako Promozio txapelketako Kopi-Urrutia / Ibai-Leiba eta, jarraian, zesta puntako Pro-Am txapelketako Gasteizko finala. Iñigo Aiestaranek ohiko adituak izango ditu lagun komentarioetan: Iñigo Oiartzabal eta Jabi Arkarazo.

16:30ean, herri kirolen tartea zabalduko dute Emarri-Ibarra emakumezkoen harri-tiratze desafioa eskaintzeko. Koldo Aldalurrek egingo du bezperan Aian jokatutako probaren kontakizuna.