22:15
'El Capital' pelikularen estreinaldia, gaurko 'La Noche de…' saioan
A.H.
EITB
Horrez gain, Robin Williams aktoreari omenaldia eskainiko dio saioak.
'La Noche de...' saioak El Capital pelikula estreinatuko du gaur gauean telebistan. Costa Gavras zinemagilearen film honek oso harrera ona izan zuen Donostiako Zinemaldiko sail ofizialean aurkeztu zutenean, duela bi urte. Krisialdi garaian aberastu diren bankarien inguruko pelikula da, eta Gad Elmaleh, Gabriel Byrne eta Liya Kebede aktoreak ditu protagonista.
Saioak, gainera, omenaldi berezia egingo dio Robin Williams aktoreari. Duela aste batzuk zendu zen aktore ospetsua, eta haren ere pelikula ezagun eta onenetakoaren 25. urteurrena beteko da laster, El Club de los poetas muertos filmarena, alegia. Felix Linaresek aktorearen ibilbide profesionala eta haren bizitzaren alderik pertsonalena ere errepasatuko ditu.
Horrez gain, Gazapos de película atalak oso pelikula ezagunetan ikus daitezkeen akatsak erakutsiko ditu eta, besteak beste, Los Goonies filmeko eszenekin barre egingo dute ikus-entzuleek.
Amaitzeko, politikaren historiako eskandalu handienen inguruko erreportajea eskainiko du La Historia según Hollywood atalak.
'La Noche de... El Capital' gaur gauean emitituko da, 22:15etik aurrera, ETB2n.