'El Conquis'en 4. atala
Hondamendia mutilen taldean: Eneko, Laiseka, Maurixio eta Luka badoaz
I.A.
Lukak saioa utzi ondoren, Ibanen aurkako borroka galdu du Maurixiok, eta kapitainek ezin izan dituzte Seco eta Maritxalar gainditu.
Lukaren erdi-kanporatzerik ez zuten espero mutilek, eta, ia ohartu ere egin gabe, egoera kontrolpean izatetik nahasita zebilen Roberto Laisekaren esku gelditu ziren. Txirrindulari ohiak taldeko arima arriskuan jartzea erabaki zuen, eta Maurixiok ordaindu behar izan du besteen hutsa; izan ere, Iturengo lehiakideak jaso zuen borroka jokatzeko lehen izendapena. Eneko Van Horenbeke ez zegoen Maurixioren izendapenarekin ados, eta bere mailako aurkari bat jarri zion: Iban. Donostiarrak duelura joan nahi zuela adierazi zuen Enekok.
Iban Maurixiori gailendu zitzaion lehian, eta saioko gatza eta piperra abenturatik kanpo utzi zuen. Ibanen garaipenik garratzena izan zen, zalantzarik gabe.
Baina Maurixiorena ez zen eguneko agur bakarra izango: kapitainek lehiakideak agurtu zituzten, beraien borrokara joan aurretik. David Seco eta Manu Maritxalar ala Eneko Van Horenbeke eta Roberto Laiseka, etxera nortzuk joango ziren erabakiko zuen lehiak.
Kapitainen dueluak planteamendu erraza zuen: bikoteko kideetako batek 120 metroko tirolina bat igo behar zuen, eta, bukatutakoan, eskailera bat jaitsi behar zuen. Beste taldekideak eskaileratik gora egin behar zuen.
Saioaren hasieratik eskuak min hartuta zituen Enekok, eta David Secok tirolinan nola aise aurreratzen zuen ikusi zuen arraunlariak. Abantaila hura izan, zen, hain zuzen ere, nesken kapitainen garaipena ahalbidetu zuena. Izan ere, Roberto Laiseka oso azkar igo zen eskaileran gora. Halere, txirrindulari ohiaren bizkortasuna ez zen nahikoa izan, Maritxalarrek berak baino lehen lortu baitzuen goraino iristea.
Seco eta Maritxalarren garaipenaren ostean, bien arteko gerturatzea ikusi genuen, adiskidetasun zantzu bat izango balitz bezala. Dena den, adiskidantza horrek ez zuen luzaro iraun, Enekoren eta Laisekaren agurrean ikusi genuen bezala.
Neskak eta mutilak fase berrira bidean dira, eta bertan aurkituko dituzte David Seco, Manu Maritxalar, Sergio, Andeka, eta, nola ez, gure kapitain kuttunenak. Izan ere, Korta eta Juanito hemen dira. Aurreko saioetan elurretan aurrera eta atzera ibili ostean, aurkitu dute beraien materiala eta beraiek ere fase berrira bidean dira.