Oihanak jokoa galdu du eta Sergiok kondorrak salbatu ditu

Oihana kanporatuta, bost kide baino ez dituzte pumen taldean, eta taldea deuseztatzetik libratzeko aukera urriagoak, beraz. Kondorrak, bestetik, taldea desagertzea ekidin dute Sergiori esker, David Secok gogokoen duen lehiakideari esker, hain zuzen ere.

Dena dela, Aretxabaletako futbolariak garesti ordaindu zuen lehia galtzea. Kakoen jokoaren lehen zatia biek bukatu zuten, arazo barik. Bigarren zatian, Sergiok bere altuerari probetxua atera eta enborreraino iristea lortu zuen, han atseden hartzeko; Oihanak, berriz, ezin izan zuen bigarren atsedenleku horretara iritsi. Handik aurrera, bietako batek ere ezin izan zuen bigarren zatia egin, eta pumen taldeko neskak eroriko txarra izanda, proba bukatu gabe eman zuten amaitutzat. Oihanak negar egin zuen, atsekabe handiz, hartutako kolpeak eragindako minagatik eta, batez ere, Patagoniako abentura horrela bukatzeagatik.

Oraindik ikusteko dago Sergio uste bezain indartsua den eta bere kapitainaren erabateko babesa merezi duen. Oraingoz, ez du erakutsi ‘Conquistour’ saioko irabazle gisa izan beharko lituzkeen indarra eta bizkortasuna. Baina oraindik saioan lehia ugari dituzte aurretik, eta ziur nafarra irabazle izateko kinieletan izango dela.

Borjak ahaztuta utziko du janariaren zakua

Aste honetako atalaren beste gai nagusietako bat guanakoen janariaren zakua izan da. Immunitatearen jokoa bukatutakoan, Borjak ahaztuta utzi zuen zakua, eta pumek euren kanpamentura eraman zuten. Juanito eta Korta egindako hutsegiteaz ohartu zirenean (lapurreta zela esan zuten eurek), kameren aurrean ezer ez esatea erabaki zuten. Saioan sarritan erabili izan duten erabakia da hori, baina ez zuen luzaroan iraun. Haserrealdia pasatu zenean, Manuren eta haren taldearen aurka gaizki-esaka aritu ziren, eta zakua bueltatu ezean, beharrezkoa balitz, jotzeko mehatxua egin zien. Gorriek, bestalde, ez zuten janaria bueltatzeko asmorik.

Argi dago duela urte batzuk Juanitok eta Kortak ez zutela halako hutsegiterik egingo, eta norbaitek egitekotan, Manuk egingo lukeela ziurrenik. Badirudi, baina, aurten dena gaizki joan zaiela "El Conquistador del Fin del Mundo" saioko "azeri zaharrei". Taldean giro txarra dute, nahiz eta lehia irabazi, eta janari faltari ondorengo jokoren bat galtzea gehitzen badiote, ondorioa benetan gogorra izan daiteke.

Taldearen batasuna mantendu du Secok

Bien bitartean, jokoetan batere zorterik gabe jarraitzen dute kondorrek. Azken jokoa, pista amerikarrekoa, bi segundorengatik galdu dute. David Secok eta taldekideek ez dute etsi zoritxarren aurrean, eta abenturako talde batuena da. Kapitaina beti harro agertzen da Manuren aurrean eta ondo jakin du taldearen batasuna mantentzen, une gozoetan zein txarretan bere kategoria erakutsiz.