Urtemuga
'La Noche de...'k 20 urte bete ditu
EITB
Gaur gauean atal bikoitz berezia eskainiko du saioak bere urteurrenean: Seven filmaren emanaldia eta Paco Leonen Vaca Paloma film laburraren estreinaldia.
'La Noche de…' saioak 20 urte bete ditu, eta, ibilbide luze hori ospatzeko, oso saio berezia eskainiko du gaur gauean. Bi hamarkada hauetan ez du hutsik egin Felix Linaresek asteartero aurkeztutako saioak. Zinema munduko daturik harrigarrienak, Hollywoodeko istorio dibertigarrienak eta zinemari buruzko pasadizo eta bitxikeria paregabeak eskaintzen dizkie ikus-entzuleei saioak astero-astero. Aste honetako saio bikoitzak Seven intrigazko thriller ezaguna eskainiko du, eta, ondoren, Paco Leonen Vaca Paloma film laburraren estreinaldia telebistan.
Duela 20 urte, ondoren eman ohi den pelikula aurkeztea zen saioaren helburua. Baina urteak igaro ahala, 'LND' saioak izaera propioa garatu du eta atal berriak erantsi ditu. Ibilbide luzeak eta audientziaren babesak zinema munduko beste hainbat alor jorratzera bultzatu du saioaren lantaldea.
Entretenitzeko eta dibertitzeko xedea galdu gabe, audientziarentzat ezezagunak diren zinemaren inguruko datu fidagarriak eman ditu saioak, eta horrela, ikus-entzuleen ikusmina piztea lortu du. Halaber, 'La Noche de...' zinema preskriptore bikaina bihurtu da, bere ibilbide luzeari eta lortutako audientzia datu harrigarriei esker. Zinema eta kultura alorreko irrati esatari aditua den heinean, Felix Linares aurkezleak oso ondo bereganatu du saioaren filosofia.
ETB2ko erreferentziazko saio bihurtu da 'La Noche de...', eta katearen audientzia marka hobetu du urtero. Aurten, batez beste, % 9,7ko audientzia zatia eta 212.000 ikus-entzuleko audientzia metatua lortu ditu Euskadin eta eragin-eremuan.
Programa bikoitza eta berezia
'La Noche de...'k saio bikoitzarekin ospatuko du bere 20. urteurrena. Hasteko, Felix Linaresek aurkezten duen saioak Seven filma aukeratu du, pelikula zineman estreinatu zenetik 20 urte pasatu baitira. Saioak film hori grabatzeko lanen datu guztiak emango ditu, eta bi hamarkada geroago oraindik pelikula zirraragarria izaten jarraitzen duela erakutsiko du. Horrez gain, Brad Pitt aktore protagonistaren ibilbide pertsonal eta profesionala errepasatuko du Los siete pecados capitales de Brad Pitt atalean. 'La Noche de...'k, gainera, 20 urte hauetan egindako akatsak azalduko ditu, eta hainbat sorpresarekin harrituko ditu ikus-entzuleak.
Pelikula ikusi ondoren, 'La Noche de...'k Paco Leonen Vaca Paloma film laburra eskainiko du telebistan. Oso film berezia da, eta aurtengo Zinemaldian aurkeztu dute zinema-aretoetan. Saioak Vaca Paloma-ren sekretu eta datu guztiak azalduko ditu, eta, horrez gain, Paco Leonen ibilbidean murgildu eta horren bizitzaren inguruko titularrik dibertigarrienak eskainiko ditu.
eskainiko ditu.