Zuzenean
Real Sociedad B-Sestao River eta pilota, gaur, ETBn
A.A.
EiTB
Xalak eta Ezkurdiak jokatuko duten Lau t'erdiko Txapelketako final zortzirenetako partida eskainiko da Biarritzetik.
Futbolarekin ekingo die ETB1ek eta eitb.eus-ek larunbat honetako kirol emankizunei. Real Sociedad B eta Sestao River taldeen arteko norgehiagokaren zuzeneko kontakizuna egingo dute Xabier Anduezak, Juanan Larrañagak eta Erik Hernandezek Zubietatik, 16:00etatik aurrera.
18:00etan hasiko den 'ETB Kantxa' saioak Biarritzeko pilota jaialdia eskainiko du zuzenean. Atariko neurketa Gorka-Irusta eta Mendizabal III-Merino bikoteek jokatuko dute. Partida nagusian, berriz, Xala eta Ezkurdia izango dira aurrez aurre, Lau t'erdiko Txapelketako final zortzirenetan. Josetxo Lizartzak gidatuko du emankizuna Jokin Errasti lagun duela. Iban Bengoetxeak egingo ditu elkarrizketak.
Bestalde, eguerdiko 12:00etan, ETB4an, Durangoko Baque Txapelketako finalak izango dira ikusgai, Iñigo Aiestaranen kontakizunarekin.