Bera Beraren partida eta Soriako pilota jaialdia, gaur, ETBn

Igande honetako 'Oreka' saioak Emakumeen Eskubaloi Ligako 21. jardunaldian Bera Berak Mecalia At. Guardes taldearen aurka jokatuko duen norgehiagoka eskainiko du. 12:00etan hasiko da eta Jon Ander Gorospe, Matxalen Ziarsolo eta Sara Gandara arduratuko dira kontakizunaz.

ETB1ek eta eitb.eus-ek eskainiko duten bigarren zuzeneko kirol emankizuna Soriako pilota jaialdia izango da, 17:00etan. Bertan, bi partida jokatuko dira: Berasaluze II- Barriola / Elezkano II-Zabaleta eta Buruz Buruko Txapelketako Jaunarena-Irribarria. Xabier Euzkitze, Joxan Tolosa eta Elena Azpeitia zuzenean arituko dira bertatik.

Igandeko ETB1en kirol eskaintza herri kirolek eta estropadek osatuko dute. 11:00etan, Aiako Peru Harria Txapelketan gertatutakoa bilduko du Ibon Gaztañazpik. 16:00etan, berriz, goizean Abaltzisketan jokatutako banakako Eusko Label sariko kanporaketaren berri emango du, Jose Etxebeste lagun duela. 16:30ean, goizean Legution jokatutako Euskal Herriko Batel Txapelketaren ingurukoak ekarriko ditu Juanan Legorburuk.

Bestalde, ETB4n erremonteko Sagardoaren Txapelketako bi finalerdi eskainiko dira: Ezkurra II-Larrañaga / Uterga-Aizpuru III eta Urriza-Labaka / Matxin III-Endika. Iñigo Aiestaran eta Manuel Arrizabalaga 'Matxin' arduratuko dira kontakizunaz.

Emanaldi guztiak eitb.eus-en ere jarraitu ahal izango dira.