Zinerik arrakastatsuena, uda honetan, ETBn ikusgai

Euskal Telebistak Sony etxearekin lortutako hitzarmenari esker, film sorta berria eskainiko du ETBk udaren hasierarekin batera. Aktore ezagunak protagonista dituzten izen handiko filmak izango dira ikusgai. Interstellar, Elysium, Chappie, After earth, Sex tape eta Jupiter ascending pelikulak estreinatuko dira, eta Mad Max: Fury road, Capitan Phillips, Spiderman 2, Focus, Fury eta The Intern filmak ere izango dira ikusgai, baita 8 apellidos vascos eta 8 apellidos catalanes komedia arrakastatsuak ere.

ETBk eskainiko dituen lehenengo bi filmak 'La Noche de...' saioak estreinatuko ditu telebistan. Ekainaren 28an, After earth izango da ikusgai, Will Smith protagonista duen M. Night Shyamalan zuzendariaren film arrakastatsua, eta uztailaren 5ean, Elysium, Matt Damon eta Jodie Foster protagonista dituen zientzia fikziozko eragin handiko pelikula.

Euskal Telebistak hurrengo hilabeteotan estreinatuko dituen filmen artean, gainera, honakoak daude: Chappie, Hugh Jacman eta Sigourney Weaver Neil Blomkap gaur eguneko zientzia fikzioaren erreferente berria bihurtu den zuzendariaren esanetara jartzen dituen film bikaina; Interstellar, Christopher Nolan zuzendariaren (The Dark Knight trilogiaren eta Hastapena pelikularen egilea) azkena, Mathew McConaughey, Anne Hathaway eta Michael Caine aktore nagusi dituena; Sex tape, Cameron Diaz eta Jason Segel protagonista dituen komedia bikaina; eta Jupiter ascending, Wachowski ahizpen (Matrix) azken pelikula, Channing Tatum eta Mila Kunis protagonista dituena. Film horretako hainbat eszena Bilbon filmatu zituzten.

Horrez gain, nahiz eta estreinaldiak ez izan, beste hainbat film bikain eskainiko ditu Euskal Telebistak: Fury, Brad Pitt protagonista duen Bigarren Mundu Gerran girotutako film saritua; Capitan Phillips, Paul Greengrass zuzendari entzutetsuaren filma, Tom Hanks protagonista duena; The amazing Spiderman 2, saga osoko filmik berriena; Focus, Will Smith eta Margot Robbie protagonista dituen komedia; Mad Max: Fury road, urteko filmerik onenetarikoa (Charlize Theron eta Tom Hardy); San Andres, Dwayne Johnson protagonista duen akziozko filma; The intern, Robert de Niro eta Anne Hathaway protagonista dituen  pelikula; eta 8 apellidos vascos eta 8 apellidos catalanes arrakasta handiko komediak.