Kirol emanaldiak
San Fermin pilota torneoa zuzenean, gaur, ETB1en eta eitb.eus-en
A.H. | EITB
Frantziako Tourraren zazpigarren etapa ere eskainiko du Euskal Telebistak zuzenean.
Gaur Euskal Telebistak Iruñeko Labrit pilotalekuarekin bat egingo du zuzenean eta bertan jokatuko den pilota jaialdia eskainiko du 22:15etik aurrera. Hasteko, Agirre-Imaz eta Ugalde-Martija bikoteek jokatuko dute atariko partida, eta ondoren, Olaizola II-Albisu eta Ezkurdia-Zabaleta San Fermin Torneoan arituko dira aurrez aurre. Arretxe II-Apraiz eta Gorka-Merino I bikoteek jokatuko dute jardunaldiko azkeneko norgehiagoka. Xabier Euzkitze eta Joxan Tolosa komentaristek egingo dute emanaldiaren kontakizuna ETB1en eta eitb.eus-en.
Tourraren 7. etapa
15:00etatik aurrera, Frantziako Tourraren zazpigarren etaparekin bat egingo dute ETB1ek eta eitb.eus-ek zuzenean. Isle-Jordain eta Lac de Payolle herrien arteko 162 kilometroko ibilbidea izango du lasterketak, eta Fermin Aramendik, Xabier Usabiagak eta Pedro Mari Goikoetxeak egingo dute emanaldiaren kontakizuna.