Euskal Irrati Telebistaren igandeko kirol eskaintzak arrauna izango du abiapuntu. Boiroko Bandera jokatuko dute San Miguel Ligako traineruek 12:00etatik aurrera, eta horren berri zuzenean emango dute Mikel Olazabalek, Ibon Gaztañazpik eta Sara Gandarak ETB1en.

Arratsaldean, bi kirol emankizun izango dira: Frantziako Tourreko azken etapa eta Etxebarriko pilota jaialdia. Fermin Aramendik, Xabier Usabiagak eta Pedro Mari Goikoetxeak Chantillyn hasi eta Parisen amaituko den etaparen nondik norakoak ekarriko dizkigute 16:00etan.

17:30ean, txirrindularitza emankizuna ETB4ra pasatuko da, eta 'ETB Kantxa' saioa hasiko da ETB1en . Bi partida jokatuko dira: J. Retegi-Irusta eta Jaunarena-Merino I bikoteen artekoa eta Irribarria-Rezusta eta Altuna III-Barriolaren artekoa, Bizkaiko 5 eta erdiko torneokoa, azkena. Xabier Euzkitze, Joxean Tolosa eta Elena Azpeitia izango dira esatariak.

ETB1eko kirol eskaintza osatzeko, herri kirolen tartea zabalduko dute 13:30ean, hilaren 17an Alegian jokatu zen Harri Txikien Euskal Herriko Txapelketa eskaintzeko. Juanan Legorburu arduratuko da emanaldiaz.

Azkenik, ETB4n, 11:00etan, pilota afizionatuen Euskal Herriko Herriarteko Txapelketako finala izango da ikusgai, Iñigo Aiestaranen eta Jon Eskuderoren kontakizunarekin.

Emanaldi guztiak eitb.eus-en ere jarraitu ahal izango dira.