Gerra karlistak aztergai, gaur, 'Una Historia de Vasconia' saioan

XIX. mendean, mundua ikusi eta politika pentsatzeko bi ikuspegi zeharo ezberdinek talka egin zuten: batetik, ikusmolde liberala, Frantziako Iraultzaren hastapen eta balioetan oinarrituta, eta bestetik, absolutismoa, erlijioa, ordena eta monarkia tradizionalak ardatz zituena.

Euskal Herrian talka honek bi gerra zibil eragin zituen, gerra karlistak, eta gaurko 'Una historia de Vasconia' saioak, horien nondik norakoak aztertuko ditu. Zumalakarregi anaien artean argi eta garbi agertu zen gatazka hau, eta bien arteko talka honetan ere murgilduko da Alberto Santana historialaria, garaiko gizartearen banaketa egoeraren adierazgarri baitzen. Miguel Antonio politikari liberal nabarmena zen. Gipuzkoan diputatu izan zen hainbat aldiz, eta 1812ko Cadizko Konstituzioaren idazleetako bat ere bai. Tomas de Zumalakarregi, berriz, karlista zen, eta pentsamolde antiliberala eta ultrakontserbadorea zeukan.

'Una historia de Vasconia' gaur izango da ikusgai, 22:30etik aurrera, ETB2n.