'Ahoz Aho' saio berria ETB1en, Amaia Cayerok aurkeztuta

Gaur, 'Ahoz Aho' saioa estreinatu du ETB1ek. Bertan, guztion ahotan dabiltzan gaiak ekarriko dituzte Amaia Cayerok, Ruben Abalek eta Ilaski Serranok. Gaurkotasunaren analisia eta eztabaida izango dira nagusi, baina kulturak ere lekua izango du. Astearte gauero, gainera, 'Ahoz aho+' tartea zabalduko dute. Bertan, elkarrizketa sakon bat izango dute lehendabizi, eta mahai-ingurua, ondoren.

Bi orduko programa izango da, zuzenean, eta askotariko gaiak jorratuko dituzte. Elkarrizketak, kolaboratzaileak eta solasaldi irekiak ere izango dituzte, saioa jantzi eta bizitzeko.

Kolaboratzaileen artean, besteak beste, Arantxa Urretabizkaia, Joseba Urkiola, Jasone Osoro, Aitor Abaroa, Iratxe Fresneda, Josu Goikoetxea eta Unai Brea izango dituzte. Halaber, solasaldirako mahaian ere, ahots anitz batuko dituzte egunero: Pili Kaltzada,  Adrian Zelaia, Eider Alkorta, Mertxe Aizpurua, Jesus Mari Mujika, Itxaso Andueza, Galder del Campo, Begoña Errazti...

Astelehenen honetan, esaterako, eta Kontxako estropadaren biharamunean, arrauna izango dute hizpide Ibon Gaztañazpi eta Kepa Iribar kazetariekin. Gainera, Jon Ariza de Miguel idazlea elkarrizketatuko dute. Solaserako mahaian, Josune Ariztondo, Mikel Eizagirre eta Galder del Campo izango dituzte, eta Eli Zunzunegi EiTBk Bartzelonan duen berriemaileak bezperan ospatu den Diadaren kronika egingo du. Halaber, Jasone Osoro, Josu Goikoetxea eta Arantxa Urretabizkaiaren kolaborazioa izango dute lehen saio honetan.

'Ahoz Aho', astelehenetik ostiralera izango da ikusgai ETB1en, 16:00etan.