22:30ean
Marcelo Ferreira izango da protagonista gaurko 'El Conquis'en
A.H. | EITB
Talde urdineko kapitaina abenturatik kanporatu zuten eta bere bizipen eta iritziak azaltzeko aukera izango du Patxi Alonsok gidatutako debatean.
Patxi Alonsok gidatzen duen 'El Conquis' eztabaida-saioak Marcelo Ferreira talde urdineko kapitainaren kanporaketa izango du hizpide gaur gauean. Boxeolari brasildarrak hamaika azalpen eman beharko ditu Idoia bere taldekideari emandako bultzakadaren inguruan. Horrez gain, Idoiak berari esandako hitz arrazisten inguruan arituko da. Saio beroa izango da asteazkenekoa, eta Ferreirak 'El Conquistador'eko kapitain moduan izandako esperientziaren berri emango du luze eta zabal.
Ohi denez, asteleheneko saioan ikusi gabeko irudiak erakutsiko dituzte, baita hurrengo atalaren aurrerapena eta Gotzonen debatean kamera aurrean egindako testigantzak ere. Solaskide moduan, Eneko Van Horenbeke, Isa Landa, Gotzon Mantuliz, Raul Arribas, Leku, Angela eta Coral arituko dira.
Ikus-entzuleek, gainera, saioaren webgunearen bitartez euren iritziak emateko aukera izango dute, eta honako galdera honi erantzun beharko diote: Marcelo Ferreira kanporatzeko erabakia egokia izan al da? Joseina Etxebarriaren musikak eta Ainhoa Etxebarriak Twitter sarean bilduko dituen mezuek biribilduko dute asteazkeneko saio beroa.
'El Conquis' asteazkenetan izaten da ikusgai, 22:30etik aurrera, ETB2n eta eitb.eus-en.