Olgaren grinak etxera bidali du Enara, gorrien lehen kanporatua

"El Conquistador del Caribe" saioaren 8. atalean, gorriek kide bat galdu dute abentura honetan lehen aldiz. Enarak Olgaren aurkako duelua galdu zuen. Bi lehiakideek banbu enbor bat kolpekatu behar zuten itsu-itsuan, goiko aldean zuen motzondo bat botatzeko. Enarak askoz gehiagotan jo zuen banbu enborra, baina Olgaren kolpeak sendoagoak izan ziren. Azkenean, begiak zabalik zituztela, errusiarra bere botere fisikoaz eta grinaz baliatu zen garaipena lortzeko. Talde urdineko immunitatea lortze aldera, borroka egiteko prest dago Olga, eta horretarako bi aukera ditu: kapitaina izatea (kapitainaren besokoa txandakatzen dute) edo kapitain berriak immunitatea berari ematea. Samuluen dinamika nolakoa izaten ari den ikusita, badirudi bi aukeretako bat ere ez dela beteko, oraingoz.

Saioak, gainera, zenbait gauza argitu zituen. Berdeak bi taldetan banatuta daude: David Seco, Saioa eta Aiskander, batetik; eta La Kaxer eta Mayayotarrak (Mikel eta Iñaki), bestetik. Aitor, Adriana eta Hugo kapitainaren aldeko taldean daudela dirudi, baina ez dago oso argi. Saioak arrantzaleekin egin zuen iruzurrak handitu egin du bi taldeen arteko aldea, eta badirudi bizikidetza izango dela David Seco kapitain beteranoak gainditu beharreko erronka nagusia.

Bestalde, zortzigarren atalean argi geratu zen gorrien artean ere arazoak daudela. Daviden ustez, taldekideek ezberdin erantzuten dute jokoetan akatsak taldekide batzuek edo beste batzuek egin. Kokoen proban deskalifikatu egin zuten, eta ez zuen saririk lortu. Taldekideak harekin asaskatu ziren; Unaik eta Izetak egin zizkioten kritikarik mingarrienak. Gorriak kanpamentu oso txirora itzuli ziren, baina infernua ez da horren gogorra, Ismaren umoreari esker. Isma deprimitzen den egunean, taldea indarrik gabe geldituko da.

Kokoen immunitate jokoa salbazioa izan zen talde berdearentzat. Davidek asmatu egin zuen indartsuenak lehen txandan jartzean. Aitorrek, Kemenek eta Aiskanderrek (asko sufrituta) koko bana lortu zuten, eta horrek garaipena eman zion taldeari. Adriana eta Hugo agerian geratu ziren. Urdinen artean, nabarmen geratu zen Dennisen ezina; kubatarrak hainbat koko bildu ditu kanpamentu txiroko palmondoetan, baina jokoan ez zuen bat bera ere hartu. Carolek ahal zuena egin zuen, eta jokoaren fase erabakigarrian Nereak bera ez gainditzea lortu zuen. Gorrien inguruan, ez dago asko esateko. Erkuk ez zuen asmatu parte-hartzaileen aukeraketan, eta Davidi eta Nereari kale egitea egotzi diete, nahiz eta indartsu-ospea izan.