Gaur
Eusko Label sariko finala, Azpeititik zuzenean, ETB1en eta eitb.eus-en
EiTB
Bezperan Hernanin jokatutako Barrenetxea IV / Segurola-Agirrezabala erremonte partida ere eskainiko da.
Azpeitian jokatuko den Eusko Label sariko finalak zuzenean jarraitu ahal izango ditugu gaur ETB1en eta eitb.eus-en, 12:00etatik aurrera. Aizkolariak bakarka eta harrijasotzaileak binaka arituko dira nor baino nor gehiago. Juanan Legorburu, Joxe Etxebeste eta Xabier Andueza izango dira esatariak.
Arratsaldean, 17:00etan, 'Gure Bideoteka' tartea zabalduko dute eta partida hauek eskainiko dira: Urrutikoetxea-Altuna III (2017ko Lau T'erdiko Txapelketako finala), Retegi-Altuna III (aurtengo Buruz Buruko Txapelketako final zortzirenetako neurketa), Urrutikoetxea-Altuna III (aurtengo Buruz Buruko final laurdenetako neurketa), Ezkurdia-Altuna III (aurtengo Buruz Buruko finalerdietako partida) eta Olaizola II-Altuna III (azken Buruz Buruko finala).
Bestalde, 11:30ean, ETB4n eta eitb.eus-en, bezperan Hernanin jokatutako Barrenetxea IV / Segurola-Agirrezabala erremonte norgehiagoka eskainiko da. Iñigo Aiestaranek egingo du kontakizuna Manuel Arrizabalaga Matxin lagun duela.