12:00etan
Euskadiko Traineru txapelketa, gaur, Lekeitiotik zuzenean, ETB1en eta eitb.eus-en
EITB
Gainera, Zarauzko pilota jaialdia eta Zazpi Herrialdeen arteko Herri Kirolen txapelketa eskainiko dira.
Gaur, Euskadiko traineru txapelketa eskainiko dute ETB1ek eta eitb.eus-ek Lekeitiotik zuzenean. Emanaldia goizeko 12:00etan hasiko da eta bai emakumeen zein gizonezkoen estropadak izango dira ikusgai. Mikel Olazabalek, Ibon Gaztañazpik eta Sara Gandarak egingo dute emanaldiaren kontakizuna.
Arratsaldean, Gasteizen asteburuan jokatutako Zazpi Herrialdeen arteko herri kirolen txapelketa eskainiko du Euskal Telebistak 15:00etatik aurrera. Juanan Legorburu eta Oier Azkorbe komentaristek izango dute emanaldiaren kontakizunaren ardura. Ondoren, Getxoko txirrindularitza Sari Nagusiaren laburpena eskainiko du Afonso Arroio kazetariak 16:30ean.
Eguneko kirol emanaldiekin amaitzeko, Zarauzko pilota jaialdiarekin bat egingo dute zuzenean ETB1ek eta eitb.eus-ek arratsaldeko 17:00etatik aurrera. Hasteko, Elordi- Jaunarena eta Peña II- Eskiroz partida izango da ikusgai eta ondoren, Elezkano II-Ruiz eta Laso- Untoria bikoteen arteko norgehiagoka. Josetxo Lizartzak eta Jokin Errastik egingo dute kontakizuna.