Etxaniz, talde berdearen 'sexuen arteko gerraren' biktima errugabea

Talde berdearen baitan dagoen "sexuen arteko gerra"k lehen biktima eragin du "El Conquistador del Pacífico" saioaren 10. atalean. Itsasgizona den arren, Etxanizek ez du ikusi zetorkion olatua, aurretik eraman du eta uste baino lehenago itzuli da Getariara. Patri eta Nagoreren taldeko izendapenek erakutsi dute sexuen arteko banaketak taldearen itxurazko harmonia hauts dezakeela; izan ere, aurreko immunitate jokoetan lortutako garaipenek armoniari eutsi diote orain arte. Krasi eta Maider dira bi sexuen "adar armatuak", eta gainerako lehiakideak hanka-puntetan igaro dira kanpamentuan dagoen gatazka estalitik. Kapitainek lan nekeza izango dute taldekide guztien nahiak ase nahi badituzte; zer egin erabaki beharko dute: ustez indartsuenak direnak babestu ala Ja taldeko zenbait emakume dueluetatik at utzi.

Dena den, kanporaketa dueluan argi gelditu da Etxaniz ez zegoela "indartsu"en taldean, nahiz eta gizonezkoa izan. Ez du gehiegirik iraun barretatik zintzilik, eta egoera zailtzen hasi denean Panamako hondarretara erori da. Gorkak aise irabazi dio, nahiz eta arerioa Ibai izan izan balu, garaipena askoz zailagoa izango zitekeen. Enekok eta Davidek lasaitua hartu dute berriz ere match point bat salbatu ostean, eta talde urdinen desegitea eperik gabe atzeratu da.

Bitartean, gorriak kanpamentu aberatsaren lasaitasunaz gozatzen ari dira eta Seletaren eta Manuren arteko liskarra une batez eten dute; dena den, lehiakide guztiak Berriatuako kapitainaren aliatu bilakatu dira. Taldeen arteko lehia itzultzen denean ikusiko da nola erantzuten duen alde bakoitzak immunitatea lortzeko guduan. Aizkoren eta enborren jokoan garaipena lortu badute beste taldeek egin dituzten hutsengatik izan da. Urdinak izan dira lehenak enborra mozten, baina David Secori buruan sartu zaio enborra sokaren laguntzaz garraiatu behar zutela. Berdeek ere eskuetan izan dute garaipena, baina enborra lotzerakoan denbora asko galdu dute eta Patrik orain arteko lehen akats larria izan du.

Ez ezazu galdu "El Conquistador del Pacífico", astelehenetan, 22:30ean, ETB2n eta eitb.eus-en. Gainera, saioaren atalak EiTB Nahieranen ikus daitezke.