Kirolak
4 eta erdiko San Fermin Torneoko finala eta Tourreko bigarren etapa, gaur
EiTB
Horrez gain, Coruñako Banderaren bigarren jardunaldia eta Euskadiko Emakumezkoen Herri Kirol Txapelketa izango ditugu.
Lau T'erdiko San Fermin Txapelketako finala Altuna III eta Artola pilotarien artean.
4 eta erdiko San Fermin Torneoko finalak zabalduko du igandeko kirol eskaintza ETBn eta eitb.eus-en. ETB2n jarraitu ahal izango dugu Altuna III.a eta Artola aurrez aurre jarriko dituen norgehiagoka, 11:00etan, Iruñetik zuzenean. Arteaga II.a eta Larunbe eta Etxeberria eta Tolosa bikoteen artekoak hasiko du jaialdia.
Ordu berean, ETB1en, estropadak izango ditugu Coruñatik. Bertako banderaren 2. jardunaldia jokatuko da Euskotren eta Eusko Label ligen barruan.
15:00etan hasiko da eguneko zuzeneko hirugarren emankizuna: Frantziako Tourreko 2. etapa, taldekako erlojuaren kontrako 27 kilometroko proba, Brusela hiriburuan. ETB1en osorik izango da ikusgai.
Azkenik, goizean, 11:00etan, Euskadiko Emakumezkoen Herri Kirol Txapelketaz gozatzeko aukera izango dugu ETB1en. Harri-jasotze proba izango da lehenengo eta aizkora-jokoa ondoren.