Futbola ETBn
Carranza Trofeoko Athletic-CD Tacon partida, gaur, ETB2n
eitb.eus
Emakumezkoen futbol taldeek soilik jokatuko dute aurten torneo ezagun hau. Athletic finalera iristen bada, final hori ere emango du EiTBk.
2019ko Carranza Trofeoko kartel iragarlea. Argazkia: www.cadizcf.com
Futbol taldeak denboraldi-aurrean sartuta daude bete-betean. Gaur, astelehena, emakumezkoek Ramon Carranza Trofeoko partida dute. Athletic eta CD Tacon taldeak arituko dira bertan, eta EiTB Taldearen bidez ikusi ahal izango da partida. ETB2k (euskaraz) eta eitb.eus-ek emango dute partida, 22:00etan hasita.
Gaurtik asteazkenera bitartean jokatuko da aurten Ramon Carranza Trofeo ezaguna. 65. ekitaldia berritasun handi batekin dator: emakumezkoen taldeek besterik ez dute parte hartuko.
Horrenbestez, aurten aitzindaria izango den ekitaldian arituko diren taldeen artean, Athleticekin batera, beste hiru talde hauek esku hartuko dute: CD Tacon, Tottenham Hotspur Women eta Real Betis Feminas.
Gaurko lehen partidaren ostean, asteartean, Tottenham eta Betis arituko dira finalera sartzeko txartelaren bila, eta asteazkenean jokatuko da final handia.
Final hori EiTBren bidez jarraitzeko parada egongo da, Athleticek bertan aritzeko txartela lortuz gero. Partida hori ere, 22:00etan hasiko da.