20:00etan
Alkizan izango da "Escapadas con Joseba Arguiñano" saioa gaur
EiTB
Aurkezle eta sukaldariak Tolosaldera bisita egingo du, eta bertan Iñaki Irazabalbeitiak herriaren inguruko azalpenak emango dizkio.
Joseba Arguiñano Iñaki Irazabalbeitiarekin.EiTBko bideo batetik hartutako irudia.
"Escapadas con Joseba Arguiñano" saioak Gipuzkoako Alkiza herrira egingo du bisita gaur. Iñaki Irazabalbeitia bertako alkateak hartuko du Joseba, eta herriaren inguruko xehetasunak eman eta leku erakargarrien inguruan hitz egingo dio. Paseatu ondoren, ostatura joango dira biak, Marcos Esteban sukaldariak prestatutako plater goxoak dastatzeko.
Ondoren, Inazio Urruzola txakolindegira hurbilduko da aurkezlea. Mahastietara eta upategietara bisitak eskaintzen ditu txakolindegiak eta jatetxea ere egon badago. Sukaldean, Xabier Urruzolarekin egingo du topo.
Jose Inazio Gorostidi eta Axun Murua senar-emazteak Lete landetxeko arduradunak dira. Jauregi itxurako etxe horrek berezitasun asko ditu, eta Josebak guztien berri jakin nahi du.
Alkiza Ernioren magalean dagoela aprobetxatuz, mendira igoko da Joseba. Eñaut Sorrarainekin topatuko da bertan. Ondo baino hobeto ezagutzen du Ernio Eñautek; 2018an, gainera, marka garrantzitsua lortu zuen kirolariak: 12 aldiz igo zen tontorrera eta beste horrenbeste aldiz jaitsi korrika.
"Escapadas con Joseba Arguiñano" gaur izango da ikusgai, 20:00etan, ETB2n eta eitb.eus-en.