Txikitin izan da 6 kapitaineko fase berriaren lehen kanporatua

Hiru kapitain berrien etorrerak taldeen arteko borroka goitik behera aldatu du. Eiderrek berdeen batasun eta poztasunarekin egin du topo kanpamentu aberatsera iritsi denean. Patrik ondo hartu du Eiderren laguntza eta giro ona jokoan islatu da. Maja taldeak berriz irabazi du, oraingoan lokatzean. 10 kiloko aldea atera dio bigarrenari, bere koordinazioa eta adatsari esker. Sariak nesken aurpegia argiztatu du beste behin. Hala ere, Andreak eta Jennyk joko berri baten bezperan mozkortzea leporatu diete bere taldekideei.

Urdinek ez dute Juanito hain ondo hartu. Izan ere, mendizalea ez dago bere une onenean fisikoki eta horrek jokoetan kalte egitearen beldur dago Eneko. Lokatzean ahal duena egin du Junitok, Getxoko arraunlariaren esanetara. Behintzat, Caguama taldearen bigarren postuak kanpamentu oso txirora joatea ekidin du.

Guaraguao taldearentzat oso pasarte txarra izan da astelehenekoa. Lehenengo Caballo iritsi da, eta, egia esanda, harrera ez da oso beroa izan. Gotzonek, ia "egun on" esan aurretik benetako kapitaina bera dela argi eta garbi utzi du. Gainerakoen zeinuek eta iruzkinek ere bere alde daudela erakutsi dute. Gorrien porrotak bere ustezko indarra baliogabetu du eta kanpamentu oso txirora itzuli dira. Gutxi izango balitz, Gotzonek beste albiste txar bat jaso du. Eiderrekin berriz aurkitu da eta bere edizioko irabazleak esan dio emakume batek garaitu izana amorratzen duela benetan.

Gorrien bileran argi ikusi da Mikelen izendapenaren ondoren kapitainak egindako errietak eragina izan duela. Txikitin jarri dute gorriek arriskuan, eta Gotzonek Jon Quel bidali du duelura. Enekok Simon aukeratu du borrokarako, eta honek bermeotarra aukeratu eta erraz menderatu du. Ingelesak "El Conquistador" saioan urruti irits daitekeela erakutsi du. Bestalde, argi gelditu da Txikitinek castingean azaldu zuen harrokeria eta konkistatzaile bezala dituen trebetasunak alderantziz proportzionalak direla.