Talde berrien arteko lehen norgehiagoka, gaur gauean, "El Conquistador" saioan

"El Conquistador del Caribe" saioaren gaur gaueko atalean fase berri bat hasiko da, eta horrekin batera etorriko da Manuk eta Seletak osatu zituzten talde berrien arteko lehen norgehiagoka.

Seleta eta Manu izan ziren aurreko jokoan protagonista, baina orain Caguama eta Guaraguao taldeen arteko aurrez aurrekoa etorriko da. Taldekideak aukeratzean zein kapitain izan zen abilena jakingo dugu joko honen ostean.

Aizkorekin enbor bana moztea izango da joko honetako lehen zeregina. Ondoren, enborrarekin zirkuitu bat egin beharko dute, mangladien artean alde batetik bestera eraman, eta azkenik soka bat erabiliz gora igo beharko dute. Bi taldeek elkarren kontra egingo dute behin eta berriz. 

Galtzaileak lider berriaren agintea zalantzan jartzen hasiko dira. Eta fase berria iritsi den honetan, aurretik zeuden aliantzak apurtzen hasiko direla ikusiko dugu.

Astelehenero izaten da ikusgai "El Conquistador del Caribe" realitya, 22:30ean, ETB2n eta eitb.eus-en. Orain arteko atal guztiak EiTB Nahieran zerbitzuan daude.