Kirol emanaldiak
Flaviobriga Bandera, igandean, zuzenean, ETB-1en
A.A.
EITB
Amaiurreko artzain txakur txapelketa eta Villar de Torreko pilota jaialdia ere eskainiko dira.
Estropadak, pilotak eta artzain txakurrek osatuko dute igandeko kirol eskaintza ETB-1en. Estropadak izango dira ikusgai, ohi denez, eguerdiko 12etan. Castron jokatuko den Flaviobriga Banderaren kontakizuna egingo dute Mikel Olazabal, Jose Luis Erkizia Baserri eta Ibon Gaztañazpik.
15:50ean, herri kirolei eskainitako tartean artzain txakurrak izango dira protagonista. Hilaren 15ean jokatutako Amaiurreko Sariaren nondik norakoak ekarriko ditu Koldo Aldalurrek aditu baten laguntzaz.
17:00etan pilotaren txanda izango da. Errioxako Villar de Torre herrian jokatuko den jaialdia eskainiko da zuzenean. Ongay eta Arruti, Gorka eta Cecilioren aurka arituko dira lehen partidan. Ondoren, Titin III.ak eta Merinok, Aritz Lasa eta Merino II.aren aurka neurtuko dituzte indarrak. Xabier Euzkitze, Joxan Tolosa eta Koldo Aldalur izango dira berriemaile.
Futbola eta pilota ETBSat-en
ETBSat-ek, 14:00etan, At. Madril-Osasuna partidaren laburpena emango du eta 15:30ean, afizionatu mailako pilota. Donostiako Antiguako Txapelketako finalak. Iñigo Aiestaranek egingo du kontakizuna.