Hamaika leiho irekiko dizkio ETBk 2011ri aste honetan

Euskal Telebistak informazio leiho zabala irekiko dio 2011ri, urtean zehar Euskadin eta nazioartean izandako gertakari, protagonista eta irudi ikusgarrienen bildumarekin. 'Una ventana a 2011 - Hamaika leiho 2011ri' dokumentalak euskal ikus-entzuleen artean garrantzi gehien izan dituzten albisteak jasoko ditu, haien lekukotasun eta oroitzapenen bitartez eta 2011k utzi dituen irudi txundigarrienez lagunduta. Africa Baetak gidatuko du saioa ostegunean ETB-2n eta Xabier Usabiagak gertakari garrantzitsuenen kontakizuna egingo du ostiralean ETB-1en.

Euskal Autonomia Erkidegoak bizi izan dituen gertakari gogoangarrienetan arreta berezia jarriko du saioak, hala nola, ETAren indarkeriaren behin betiko eta baldintzarik gabeko amaieraren iragarpena edota krisi ekonomikoa eta honek ekarri dituen ondorio latzak, bai langabeziari dagokionez zein euskal familien egoera ekonomikoari begira.

Dokumentalak garrantzia berezia emango die irudiei, horien artean asko dira Euskal Telebistako albistegi taldeak jasotako irudiak eta ETBko kazetariek zuzenean emandako albisteak. Adibide argia dugu Euskal Telebistak herrialde arabiarretan izandako berriemaile berezien presentzia, baita Grezia eta Italiako mobilizazioen lekuko izandako kazetariak ere. Nazioarte mailan, Japoneko lurrikara ikaragarriak utzitako irudiak ere eskainiko dira. Baina, etxera begira beste gertakari batzuk gogoratuko dira, hala nola, Amaia Azkueren hilketa eta Gipuzkoan izandako uholdeak. Udal hauteskundeak eta hauteskunde orokorrek ere bere tartea izango dute saioan.

Gertakari guzti hauek garrantzi handia izan dute Euskal Telebistako albistegietan eta aste honetan eskainiko den saio bereziak haien ikus-entzuneko balioa goraipatuko du. Hortik dokumentalaren izenburua: gertatutakoa ikusi eta entzuteko leihoa. ETBko albistegi taldeak osotasunean ekoiztutako saioa da.

'Una ventana al 2011 - Begirada bat 2011ri' ostegun honetan emitituko da 23:25etik aurrera ETB-2n eta ostiralean 20:55etik aurrera ETB-1en.