Larunbatean, 14:45ean
Jon Maia Soria, 'Hitzetik Hortzera'n
A.E.
EITB
Zuzendu duen Gazta zati bat pelikulako irudiak erakutsiko ditu.
'Hitzetik hortzera'. Jon Maia eta Jon Artano. Argazkia: EITB
Jon Maia izango da aste honetako saioan gonbidatua. Duela hiru urte hasi zen bertsolari zumaiarra, Idiazabalgo Nazioen Mundua elkarteak eskatuta, herri ekimen horren jarraipena egiten. Talde horren ibiliaren lekukotza jaso behar zuen ikus-entzunezkoak hasiera batean, baina poliki-poliki asmoa handitu eta Euskal Herrian azken garaiotan bizi ditugun gertakari politiko eta sozialen isla jaso nahi du udaberrian estreinatuko duten pelikulak. Gazta zati bat-The piece of cheese proiektuaren gorabeherak kontatuko ditu Maiak.
Gainera, Amurrion, Errege Eguneko urteroko zitan, Euskal Herriko Txapelketako azken zortzi finalistekin izandako jaialdiko onena ere emango dute; baita Zumaian urtarrilaren 7an izan zen bertso afarian Iker Zubeldiak eta Anjel Mari Peñagarikanok utzitako zirikada bizienak ere.
Larunbatean, 14:45ean, emango dute bertso-programa, 'Gaur Egun'en ostean.