Lau T'erdiko promozioko finalerdiak, gaur arratsaldean, zuzenean

Gaur, zuzeneko bi kirol emanaldi izango ditugu ETB1en eta eitb.eus-en: batetik, Izar Berriak aizkolari txapelketa; bestetik, promozio mailako Lau T'erdiko txapelketa. 

12:30ean egingo dute bat Azpeitiko Izarraitz pilotalekuarekin, Izar Berriak aizkolari txapelketaren bigarren jardunaldia eskaintzeko. Sei bikote izango dira nor baino nor gehiago: Txomin Amundarain eta Ibai Soroa, Joxean Etxeberria eta Axel Larrañaga, Hodei Ezpeleta eta Andoni Iruretagoiena Izeta VI.a, Oier eta Xuban Kañamares, Julen Olano eta Julen Gabirondo, eta Suharri Rodriguez eta Jokin Urretabizkaia. 

Arratsaldean, 17:00etan, Logroñoko Adarraga pilotalekuko jaialdia izango dugu ikusgai. Bertan, promozio mailako Lau T'erdiko Txapelketako bi finalerdiak jokatuko dira: Dario vs Bakaikoa eta Zabala vs Zubizarreta. Bi partiden artean Victor-Zabaleta eta Peña II-Mariezkurrena II bikoteak neurtuko dira. 

Santu Guztien Eguneko kirol eskaintza urriaren 12an Urnietan Iñigo Merkader eta Mikel Lizartzaren artean jokatutako korrika eta sega apustuarekin (11:00etan), larunbatean Mallabian jokatutako emakumezkoen paleta txapelketarekin (14:00etan ETB4n) eta urriaren 2an jokatutako Amorebietako artzain txakur txapelketarekin (15:30ean) osatuko da.