Jabier Baraiazarrarekin solasaldia, ostiraleko 'Forum' saioan

Mendia, zinea eta kultura izango ditu hizpide ostiral honetan Begoña Zubietak 'Forum' saioan Jabier Baraiazarra gonbidatuarekin. Mendi Film Festival jaialdiko zuzendaria hartuko du gonbidatu 10:15etik aurrera ETB-2n.

Mendiarekin zerikusia duten edota mendian egiten diren jarduerei buruzko gaiak jorratzen dituzten filmen (alpinismoa, mendiko kirolak eta abentura, eskia, ekologia, ingurumena, etnografia… ) erakusleihoa da Gasteizko zine jaialdi hau. Bertan egiten duten lana hurbiletik ezagutzeko parada izango dugu solasaldi honen bitartez.

Baraiazarrak eskuartean duten egitasmo baten berri emango du. Hain justu, bertan aurkezten diren filmak urtean zehar Euskadiko beste herri batzuetan erakustearena. Mendiarekin lotutako zinearen garapenaz ere mintzatuko da. Gainera, azken jaialdian aurkeztutako irudi hunkigarrienez gozatzeko parada izango dute ikus-entzuleek.