10. atalaren aurrerapena
Binbi, Arantxa eta hirugarren kapitain bat, galduta, "El Conquistador" saioko labirintoaren jokoan
EITB Media
Kapitain berriak Karibera bidean doaz. Inoiz baino zailagoa den labirintoaren jokoan hasiko dute abentura, galduta. Taldeentzat laguntza edo oztopo izango ote dira kapitain berriak?
Labirintoaren jokoa. Argazkia: EITB Mediako bideo batetik ateratako irudia
Errefortzuak bidean dira "El Conquistador del Caribe" saioan. Kapitain berriak iristear dira, eta, printzipioz, berri ona izan beharko luke lehiakideentzat. Agian bai, agian ez. Kapitainok bereziak bezain polemikoak dira, eta ikusteko dago laguntza edo oztopo izango diren.
Binbi da zeregin berrietan ikusiko dugun hiru horietako bat. Iazko edizioan parte hartu zuen, eta ezagun egin zen Eskoriatzakoa. Lost telesaileko protagonisten antzera, galduta ibili zen iazko labirintoaren jokoan. Hori bai, finalera iritsi zen, baina saioaren historian inoiz gertatu ez bezala, botaka egin zuen final handian. Bigarren kapitaina Arantxa dugu. Aurretik, bi aldiz hartu du parte "El Conquistador" saioan, eta, besteak beste, "Tururú tururú" esaldia esateagatik egin zen ezagun. Ez da erraz kikiltzen den horietakoa. Baina nor izango ote da hirugarren kapitaina? Hori astelehenean jakingo dugu.
Hirurek, bai ala bai, taldeak gidatzeko duten gaitasuna erakutsi beharko dute. Izan ere, labirintoaren jokoan galduta hasiko dute lehia. Eta aurten, gainera, inoiz baino zailagoa izango da. Atabey taldea da labirintotik irten eta irabazteko premia handiena duena. Nahiaren taldea egoera kritikoan dago. Lide eta Ohiane, taldeko bi zutabe, kanpoan daude, eta Leirek alde egin zuen. Behea jo dute berdeek; kapitain berriaren iritsierak, agian, zulotik atera eta aurrera egiteko indarra eman diezaieke.
Hurrengo atalean, lehiakideren batek aterkia ireki beharko du asanbladan jaurtiko dizkioten lantzetatik babesteko. Zein izango ote da? Kapitain berriak, labirinto korapilatsua, altura handiko duelua eta kanporaketa berria, astelehen honetan, "El Conquistador del Caribe"ko 10. atalean.
"El Conquistador del Caribe" astelehenetan izaten da ikusgai, 22:30ean, ETB2n, eitb.eus-en eta "El Conquis"en aplikazioan. Gainera, EITB Nahieran atarian, saioaren eta EITB Nahieran aplikazioetan eta EITB Mediaren gainerako plataforma digitaletan ikus daitezke atal guztiak.