11. atalaren aurrerapena
Animalien iraultza asteleheneko "Conquis"en; hamsterren jokoa ate joka dator!
EITB Media
Kapitainen arteko koordinazioa funtsezkoa izango da joko honetan. Nola moldatuko da Lobo, oraingo honetan? Kolokan al dago Andrea eta Arantxaren arteko harremana? Lortuko al dute berdeek bolada txarra gelditzea? Dakigun bakarra zera da, edizio honetako duelurik gogorrena jokatuko dela.
Hamsterren jokoa, "El Conquistador del Caribe". Argazkia: EITB Media
"El Conquistador del Caribe" saioko fauna protagonista duen gau basatia biziko dugu gaur gauean. Kapitainak eta beraien laguntzaileak hamster bihurtuko dira egun batez, eta bola itxurako kaiolaren barruan birak ematen azkarrenak izan beharko dute ikurrina eskuratzeko. Horretarako, ondo ulertu behar dute kanpamentuetara iritsi diren gutunetan idatzitakoa: "Immunitate jokoan kapitainen arteko koordinazioa probatuko dugu. Entrenamendu modura, bals edo tango bat dantza dezakezue".
Espero dezagun dantzalekura iritsi aurretik Lobo ez galtzea. Joan den astean, bere ezizenari men egin eta basora abiatu zen probaren erdian. Behingoz lozorrotik esnatu eta gogor ekin beharko dio, Corocote taldeak kanpamentu oso txirotik ateratzeko premia du eta. Izan ere, giroa apur bat nahastu da urdinen artean, aurreko asanbladan taldekideek Camilarekin dituzten arazoak begi-bistan geratu baitziren. Zazpi izendapen jaso zituen, bere urtebetetze-egunean bertan gainera. Horrez gain, 11. atal honetan, Caimanek, haserre, etxera itzultzeko hegaldia eskatuko du.
Yocahu taldeak, ostera, indarrak berreskuratu ditu. Ederki hasi dute Andreak eta Arantxak elkarren arteko lankidetza, baina oraindik asko dago egiteko, eta harremanak hainbat arrakala izan ditzake. Tururú-tururú egingo al dio Andreak Arantxari?
Kanpamentu aberatsa dago talde guztien jomugan, eta berdeak, noski, hara joateko irrikan daude. Binbiren etorrera ondo baino hobeto hartu du Atabey taldeak, pozik eta umore oneko daude neskak. Eskoriatzakoak, orain, bere koordinazioa proban jarri beharko du Nahiarekin batera, talde berdearen bolada txarrari amaiera emateko.
Hamsterren joko bizia ikusteaz gain, asanbladan izendapen zaparrada jasoko du lehiakideren batek. Horrez gain, Julianek esan bezala, edizio honetan izan den duelurik gogorrena izango da.
"El Conquistador del Caribe" astelehenetan izaten da ikusgai, 22:30ean, ETB2n, eitb.eus-en eta "El Conquis"en aplikazioan. Gainera, EITB Nahieran atarian, saioaren eta EITB Nahieran aplikazioetan eta EITB Mediaren gainerako plataforma digitaletan ikus daitezke atal guztiak.