23:15ean
'Tandem' dokumentalaren estreinaldia, gaur gauean, ETB2n
EITB Media
Dokumentalak Jaime Lafitaren balentria jasotzen du; Getxotik Bruselaraino, 1300 kilometroko ibilbidea egin zuen belaontzian eta bizikletan, Alboko Esklerosi Amiotrofikoaren ikerketa ikusarazteko eta sustatzeko.
Alboko Esklerosi Amiotrofikoa bistaratzea helburu du 'Tandem' dokumentalak
Gaur gauean, ETB2k Tandem dokumentala estreinatuko du 23:15ean. ELAdun gaixoa den Jaime Lafitak eta Diego bere semeak Getxotik Bruselara ELA ikusarazteko eta ikerketa sustatzeko egin zuten bidaia kontatzen du ikus-entzunezkoak.
2021eko ekainaren 11n, Jaime Lafitak eta dalecandELA elkarteak BrusELA desafioa abiatu zuten; 10 eguneko abentura itsasoz (190 milia Getxotik Arroxelara belaontzian) eta lurrez (900 kilometro Arroxelatik Bruselara).
Abentura bat eta helburu bikoitza. Alde batetik, ELA gaixotasunari ikusgarritasuna eman nahi zioten; izan ere sendabiderik gabeko gaixotasun neurodegeneratiboa da, eta mundu osoan milaka pertsonari eragiten die. Eta bestetik, Europako erakundeei gaixotasun horren ikerketan laguntza eta inbertsio handiagoa eskatu zuten.
Tandem dokumentala 23:15ean estreinatuko da ETB2n eta ondoren Nahieran-en izango da ikusgai.