Legebiltzarreko politika orokorreko eztabaida gaur, osorik eta zuzenean, ETB1en eta eitb.eus-en

Eusko Legebiltzarreko kurtso berria abian jarriko duen politika orokorreko eztabaida saioa izango dute arreta gune nagusi gaur EITB ikus-entzunezko taldeko hedabideek. Osoko Bilkura osorik eta zuzenean jarraitu ahal izango da ETB1en eta eitb.eus-en. Halaber, EITBko albistegi zerbitzuek jarraipen berezia egingo diote hitzorduari. 

Telebistako goizeko emanaldia "Egun On Euskadi" saioaren barruan egingo da, 09:00etan hasita. Iñigo Urkullu lehendakariaren hitzaldia eskaini ostean, alderdi politikoen ahotsa jasoko du Olatz Foruriak Legebiltzarretik bertatik. Bilboko platoan, Odei Esnaolak bertan esandakoak aztertuko ditu Ion Ansa, Alex Zapirain eta Maialen Ferreira solaskideekin. Arratsaldeko emankizuna 14:30ean hasiko da, Xabier Usabiagaren gidaritzapean, eta Iñaki Galdos eta Miguel Aizpuru adituen laguntza izango du. "Gaur Egun" eta "Teleberri" albistegiek ere Gasteizko ganberan gertatutakoaren kontakizun zabala egingo dute. 

ETB2ko "En Jake" saioa ordu erdi lehenago hasiko da, 11:00etan. Xabier Lapitzek aurkeztutako aktualitate saioa Legebiltzarreko Osoko Bilkurari begira izango da goiz osoan. Maria Ruiz kazetaria izango dute berriemaile berezi.

Euskadi Irratiko "Albiste Faktoria" Legebiltzarretik egingo da, eta ohi baino luzeagoa izango da, 11:30era arte. Bakartxo Tejeria presidentea elkarrizketatuko du Iñaki Guridik eta alderdi guztietako ordezkariek zuzenean baloratuko dute Urkulluren hitzaldia. Analisia egiteko Iñaki Galdos, Ainhoa Etxaide eta Iker Rioja izango dituzte. Bestalde, orduz orduko albistegiek eta albistegi nagusiek ere gertuko jarraipena egingo diote egun osoan.  

Radio Euskadiko albistegi nagusiak Gasteizko ganbaratik egingo dira. Goizean, "Boulevard"ek zuzenean emango du lehendakariaren hitzaldia eta, ondoren, talde parlamentarioetako ordezkariak elkarrizketatuko ditu Xabier Garcia Ramsdenek. Eguerdiko "Crónica de Euskadi" saioan, goizak eman duena aztertuko du Dani Alvarezek, eta, 19:00etatik aurrera, "Ganbara" saio berezia gidatuko du Arantza Garciak, eztabaida saioaren une nabarmenak aztertuz. Arratsalde osoan, ordu erdiro, konexioak egingo ditu Radio Euskadik Legebiltzarrarekin.