Sanferminetako pilota txapelketa, zuzenean, ETB-1en

Sanferminetako binakako pilota txapelketa eskainiko du ETB-1ek gaur, zuzenean. Labrit pilotalekuan jokatuko diren hiru partiden berri emango dute Xabier Euzkitze, Josean Tolosa eta Koldo Aldalur komentaristek 22:15etik aurrera.

Jardunaldiko lehenengo partida, Ongay-Peñagarikano eta Tainta-Mendizabal II bikoteek jokatuko dute eta ondoren, torneoko partida jokatuko dute Xala eta Zubietak, Irujo eta Merino II.aren aurka. Hirugarren norgehiagokari dagokionez, Apezetxea-Zabaleta eta Olaetxea-Ibai Zabala izango dira nor baino nor gehiago.

Frantziako Tourraren 11. etapa

Gaur ere, Frantziako Tourraren hamaikagarren etapa eskainiko da, Xabier Usabiaga eta Pedro Mari Goikoetxearen eskutik. Emanaldia 13:00etan hasiko da ETBKn eta 14:15etik aurrera ETB-1en izango da ikusgai.

Goi mendiko etapa gogorra izango da ostegunekoa. Albertvilletik hasiko da eta ibilbidearen 148 kilometroetan zehar ez da ia tarte laurik izango. Mendateak bata bestearen atzetik etorriko dira 13. kilometrotik aurrera, etenik gabe. La Madeleine, La Croix de Fer eta Le Mollard mendateei aurre egin beharko diete, Toussuireko helmugako igoeraren aurretik.