Hauteskunde kanpainari jarraipena, EITBko hedabide guztietan

Euskal Irrati Telebistako hedabideek, telebista, irrati eta Internet bidez, jarraipen zabala egingo diete urriaren 21eko Eusko Legebiltzarreko hauteskundeei. Alderdien ekimen eta jardueren berri, albistegietan, elkarrizketa, eztabaida eta hauteskunde gaueko saio berezitan emango da.

Alderdien programa eta hautagaien inguruan berri emango dute EITBko albistegi zerbitzuak. Halaber, web berezia izango da eitb.com-en internet bidez kanpaina jarraitzeko. Telebista eta irratietan, doako tarteez gain, eguneroko informazioa albistegietako tarte berezietan sartuko da, baina horrez gainera, elkarrizketak eta eztabaidak izango dira. Hauteskunde gauean, berriz, saio bereziak, inkestak, botoen kalkuluak eta emaitza guztiak.

Bina debate hedabide bakoitzean

Bina debate eskainiko ditu hauteskunde kanpaina honetan EITBk hedabide bakoitzeko. Telebistari dagokionez, urriaren 10ean lehen debatea eskainiko da ETB-2n, Estibaliz Ruiz de Azuak aurkeztuta eta 22:30ean hasita. Bertan, EAj-PNV, PSE-EE, PP, EH Bildu, Ezker Batua eta UPyDk izendatutako hautagaiak izango dira.

Urriaren 11an euskarazko lehen debatea eskainiko da ETB-1en, eta sei alderdietako ordezkariak izango dira. Ander Arzakek aurkeztuko du debatea, 22:15ean hasita.

Gaztelaniazko bigarren debatea urriaren 17an izango da Dani Alvarezen eskutik. Bertan lau alderdi nagusietako lehendakarigaiak egongo dira eta 22:30ean hasiko da.

Azken eztabaida euskarazkoa izango da urriaren 18an eta ETB-1en. Lau alderdi nagusietako ordezkariek hartuko dute honetan parte, Ander Arzaken gidaritzapean eta 22:15ean hasita.

Radio Euskadik, berriz, urriaren 8an emango du lehen eztabaida 'Boulevard' irratsaioaren baitan sei lehendakarigaiekin. Bigarrena, lau lehendakarigaien artekoa gaueko 'Ganbara' saioan emango da urriaren 15ean. Radio Vitorian ere entzungai izango dira eztabaidak.

Bestalde, Euskadi Irratiak ETB-1eko debateak emango ditu, baina ez egun berean, biharamunean baizik; urriaren 12 eta 19an izango dira entzungai, 'Goiz Kronika'n eta 'Albiste Faktoria'n.

Elkarrizketak egunero

Hauteskunde elkarrizketak ETB-1en 'Gaur Egun-1' ondoren, 14:45ean, eta 19:00etan, albistegien ondoren, emango dituzte. Xabier Usabiaga izango da elkarrizketatzailea.

ETB-2n, 'Egun On Euskadi' barruan egingo ditu Aitzol Zubizarretak. Arratsaldekoak, aldiz, 21:45ean izango dira eta Estibaliz Ruiz de Azuak egingo ditu.

Irratietan, berriz, Euskadi Irratian 'Faktoria'k hartuko ditu bere baitan elkarrizketak. Larunbata 6 eta 13ko elkarrizketak 09:00etan izango dira eta urriaren 14an 09:30ean. Radio Euskadin 'Boulevard'en eta 'MQP' saioetan egingo dituzte, eta Radio Vitorian 'Plaza Nueva' irratsaioaren barruan.

Interneteko web gune berezia

Gainera, EITBk kanpaina Internet bidez bizi-bizi jarraitzeko aukera eskaintzen du. Bertan, informazio guztia, kanpainako bideo eta audioak, elkarrizketak eta debateak zuzenean izango dira eta baita nahieran ere . Aurreko hauteskundeetako datuak eta EITB taldearen jarraipena, guzti-guztiak jasota geratuko da eitb.com-en.

Hauteskunde-gaua

Urriaren 21ean, hauteskunde gauean, Euskal Telebistak saio bana eskainiko du ETB-1en eta ETB-2n, 20:00ak baino lehen hasita, eta hauteskundeetako informazioa tartekatuko dute gainerako albistegi eta igandeko kirol-saioekin batera. ETB-1en Saioa Martija, Xabier Usabiaga eta Ander Arzak arituko dira. ETB-2n, berriz, Africa Baetak, Estibaliz Ruiz de Azuak eta Asier Odriozolak gidatuko dute albistegi berezia. 

Bestalde, gau horretan, EITBk Interneten dituen guneetan, emaitzak on line jarraitzeko eta botoen nondik norakoak herriz herri ezagutzeko aukera izango da. Horrez gain, hauteskunde-eguneko jarraipen zehatza egingo dute. Euskal Telebistan zein irratietan alderdi politikoen iritziak jasoko dira, inkesten emaitzen inguruan eta hauteskundeen emaitza zehatzei buruz ere. Zuzeneko harreman bideak finkatuko dira alderdi politiko nagusien egoitzekin eta datuak biltzeko zentro nagusiarekin.

Euskal Irrati Telebistako webguneak, eitb.com-ek, hauteskunde gauerako gonbidapena egin die euskal blogariei, berriro ere, gau berezi hori elkarrekin pasatzeko. Laugarren aldiz egingo da topaketa hau eta geroz eta oihartzun eta arrakasta lortzen ari da blogarien artean.