Lagun talde zabala gonbidatuko dute Miren Nogalesek eta Mikel Pagadik "Herri Txiki, Zirku Handi" saiora

Abenduaren 24ko gauean, musika eta alaitasuna izango dira protagonista nagusiak "Herri Txiki, Zirku Handi" saioko oholtzan, 23:15etik aurrera, ETB1en eta eitb.eus-en. Mikel Pagadik eta Miren Nogalesek gidatuta, aurpegi ezagunak pasako dira Gure Zirkuaren karpatik euskal kantak abestera, gaur egungoak zein aspaldikoak.

Adin eta belaunaldi ezberdinetako musikariak entzungo ditugu gau berezi horretan, tartean Janus Lester, Estitxu Pinatxo eta Petti, Pantxoa eta Orioko Salatxo abesbatza. Chill Mafiako Flako Fonki eta Kiliki Frexko Gontzal Mendibil musikariarekin batera arituko dira, estreinakoz, Merezi ote abestiaren moldaketan; eta Iker Laurobak eta Leire Letuk omenaldia egingo diote Benito Lertxundiri.

Korrontziren doinuei laguntzeko sei dantzari izango dira oholtzan, eta Sua Enparantza eta Go!azen telesaileko zenbait antzezle ere bertan izango ditugu.

Aurtengoa Joko Olinpikoen urtea izanda, ezin falta hitzordura gure kirolari olinpiko eta paralinpikoak: Iñigo Llopis, Nahia Zudaire, Naia Laso, Miren Lazkano, Janire Gonzalez-Etxabarri eta Alain Kortabitarte entzungo ditugu aurten "Herri Txiki, Zirku Handi" saio berezian.

Urtero bezala, EITBko ordezkaritza zabala hartuko dute Mirenek eta Pagadik: sukalde kontuak albo batera utzi eta mikroa hartuko dute Javi Riverok, Zigor Iturrietak, Ander Gonzalezek eta Gabriela Uriartek; eta, Ondas saria jaso berritan, Euskadi Irratiko "Faktoria Magazina" programako lantaldea animatuko da abestera.

Haurrez inguratuta, Olentzero abesti berria oparituko digu IZAROk, eta Maren bakarlariaren ahotsak ere jantziko du ETB1eko Gabon gaua.

"Herri Txiki, Zirku Handi" saio berezia, Mikel Pagadik eta Miren Nogalesek gidatuta, abenduaren 24an, 23:15ean, ETB1en eta eitb.eus-en.