'ETB-3k Lau Urte' saio berezia, ETB-3n

ETB-3k lau urte bete ditu eta ospatzeko, 'ETB-3k Lau Urte' saioa berezia eskainiko da 23:15ean, katearen ibilbidea errepasatuz eta emisioan izan diren saio nabarmenenak gogora ekarriz.

Euskal Telebistako hirugarren kateak 2008ko urriak 10ean hasi zuen bere emisioa, goizeko 10:00etan, 'Izan EITB' festa handiarekin bat eginez, eta euskara, gazteak eta kultura ardatz izan ditu hasiera hasieratik. Lehenengo ibilera hauetako saio nabarmenenen artean, Miren Gaztañagak aurkeztutako 'Martina', Jokin Etcheverriak gidatutako 'Burp' saio eroa, edota '6 Billion Others' ekimena dira aipagarriak.

Beste hainbat saio ere eman dira ETB-3n: 'Orain' erreportaje saio saritua, 'Nick Dut Nik' interneteko nondik norako guztien inguruko saio aurrekaria, 'Gaztea Live' zuzeneko kontzertuak eskaintzen zituen saioa, edota hamaika musika tarte ezberdin: 'Abbey Road Zuzenean', 'Top Gaztea', 'Gaztea Klip', Euskal Herriko jazzaldi eta musika jaialdiei eskainitakoak eta 'Gaztea XS', besteak beste.

Halaber, kirolari leihoa zabalduko dio tarteka ETB-3k, 'Abenturaroa' eta 'KTX' abenturazko kirolei buruzko saioekin, eta 'Mara Mara' neguko kirolei buruzko programarekin. Kirol zehatzagoetan oinarrituta, '4. Denbora' (errugbia) eta 'Motor Sport' (motorra) egin dira.

Zine eskaintzari dagokionez, umeentzako filmak, 'Zinemateka' saioa (pelikularen emisioaren aurreko eta ondorengo analisia eskaintzen zuen adituen eskutik) eta 'Gora Gorea!' beldurrezko zine zikloa eman dira.

Horrez gain, ETB-3k gertutik jarraitu ditu euskal kultura eta gazte ekimenak, Durangoko Azoka, Euskal Encounter eta Korrika, besteak beste. 'Zirriborro' saioa, gainera, hainbat ekimen artistikoren erakusleiho bihurtu da azken hilabeteetan.

Ezin ahaztu, bestalde, 'Lokaleroak' saioak izandako arrakasta, gaztetxoen lokalak azaldu eta beraien arteko lehiaketa proposatzen zuen saioa.

ETB-3ren lau urteko ibilbidean zeresan handia izan dute guztiek eta Euskal Telebistak gogora ekarriko ditu 'ETB-3k Lau Urte' saio berezi honetan.

Zorionak ETB-3!