Ikerneren itzulerak pozez zoratzen jarriko ditu guztiak, 'Goenkale'n

Ustekabeko itzulera izango da 'Goenkale' telesailaren gaurko atalean. Ikerne Arraldera bueltatzeak pozez zoratzen jarriko ditu guztiak. Etxean oso gustura hartu dituzte bera eta Sara, alaba, eta are gusturago egongo da Lukas, Ikernerekin zeukan harremanari berriz ekiteko itxaropena baitu.

Kandidok, ordea, egoera garratzik ere izango du. Liskarrez liskar dabil Sabinorekin eta, azken horrek, gainera, ez du su-etenik nahiko.

Garbiñerentzat ere ez da une gozoa izango. Banketxetik eskakizuna jasoko du, eta, gainera, hilda zegoela uste zuen senarrak, Estepanek, euren seme-alabekin zuzenean hitz egitea erabakiko du.

Azkenik, oroitzapenek lur jota daukate Jon. Nahigabetuta dabil, eta Inesen besoetan soilik topatzen du kontsolamendua.