Aurrerapena
Gezurrak, dilemak eta temak, gaur, 'Goenkale'n
Kandidori arazo pertsonalak eta profesionalak pilatuko zaizkio, Aimar Estepanen gezurrak ez direla amaitu ohartuko da, eta Inesek espero ez zuen aukera bat izango du.
Your browser doesn’t support HTML5 video
Gezurrak, dilemak eta temak izango dira nagusi 'Goenkale' telesailaren asteleheneko atalean (22:00etan, ETB-1en).
Hasteko, Kandidori arazo pertsonalak eta profesionalak pilatuko zaizkio. Batetik, Aliziak elkarrekin denbora gehiago igaro behar dutela esan dio, eta, bestalde, Nekanek konfiantza du beregan Asunen bitxien ikerketarekin aurrera jarraitzeko. Arrasto berriak dauzkate, eta, horiei jarraiki, Asunen baserrira, bere sorlekura, helduko da Kandido. Bisita horren ondorioz gizonari oroitzapen ugari etorriko zaio burura, eta, gainera, lapurretaren kasuari norabide aldaketa ekarriko dion zerbait topatuko du bertan. Kandidok dilema morala izango du horren ondorioz.
Bestalde, Leire tematuta dabil Garbiñek Anderren ebakuntzarako diru gehiago eman dezan, eta lortu egingo du azkenean. Baina Aimarrek ez du geldirik egoteko asmorik, eta, topatuko duen datu baten ondorioz, Estepanen gezurrak ez direla amaitu ohartuko da.
Azkenik, Inesek bere arduradunei jakinaraziko die ordena utzi nahi duela, baina, zergatik joan nahi duen esandakoan, espero ez zuen aukera bat eskainiko diote.