Bilauak vs Zaldunak
'101 Gaztelu' saioaren finala, gaur
Zaldunen eta Bilauen arteko lehian, gaur jakingo dugu nor den irabazlea. Gustukoen duzuen lehiakidea ere aukeratu dezakezue. Finalean gertatuko den guztia kontatuko dizuegu uneoro 18:30 aldera hasita.
Your browser doesn’t support HTML5 video
Gaur Julian Iantzik aurkezten duen '101 Gaztelu' saioko abentura amaierara iritsiko da. Lehiakideek Euskal Herriko zazpi herrialdeetan barreiaturik dauden 20 gaztelu bisitatu dituzte, borrokaldi propioak biziz eta mota guztietako probei aurre eginez. Final handi honetan, saioko irabazlea nor den jakingo dugu. Finalean gertatuko den guztia kontatuko dizuegu eitb.com-en uneoro 18:30 aldera hasita.
Zaldunen eta Bilauen arteko lehia bizia ikusi dugu saioaren finalaurrekoan. Zaldunek irabazi zuten Baigorrin egindako jokoa, eta Bilauek Idurre bidali zuten etxera. Hortaz, garaipen hori lortuta, Zaldunek hanka bat finalean dute, 6 bandera baitituzte, eta Bilauek, berriz, 5.
Azken aurreko atalean, Mikel Goñik alde egin zuen; beraz, Jurdan, Jonas eta Ohiana kapitainik gabe geratu dira. Manu Maritxalar bere taldearekin dago oraindik, eta, Rakel, Ane, Luka eta Iker taldekideekin batera, garaipena eskuratu nahi du finalean.
Horrez gainera, ikus-entzuleek lehiakide gogokoena aukeratzeko modua daukate saioak eitb.com-en duen atarian, eta finalean bertan jakingo dugu irabazlearen izena.
'101 Gaztelu' saioko finalean gaur bi proba ikusiko ditugu. Lehenengoan bi taldeen arteko berdinketarik ote dagoen jakiteko, eta bestea irabazlea nor den jakiteko. Lehen proban, Jose Luis Korta eta Julen Madina izango dituzte laguntzaile taldeek. Hain zuzen ere, Korta eta Madina platoan egongo dira zuzenean, abenturan zehar egon diren beste hainbat laguntzaile famaturekin batera.
ETB1en 21:45etan hasiko da '101 Gaztelu'ren finala gaur eta eitb.com-en ere zuzenean ikusi ahal izango da.