Neanderthalen garaian murgilduko da 'Arimaren Margolariak' saioa gaur gauean

Gaur gauean, 'Arimaren Margolariak' saioak 65.000 urteko bidaia egingo du denboran atzera, Neandertalgo gizakiek lehen labar-pinturak egin zituzten garaira. Horretarako, Zugarramurdiko kobetara joango dira. Bertan, Arantxa Orbegozo coach-ak, antzinako gizakiek egiten zuten antzera, pigmentuak, arrautzak, makilak eta buruko ileak erabiliz pintzelak eta margoak egiten erakutsiko die. Tresna eta pintura horiekin, harri zati batean labar-pintura bat sortu beharko dute, gai izanez gero. 

Zugarramurdiko herritarrek osatutako herri-epaimahai batek erabakiko du horietako zein den onena, eta, horrenbestez, nork jasoko duen asteko immunitatea. Kaleratze proban, margolariek akelarre bat ikusiko dute, zuzenean, eta, Francisco de Goyaren Aquelarre lana inspirazio-iturri gisa hartuta, errituala mihisera eraman beharko dute. 

Galerian, coach-ek erabakiko dute nork islatu duen ondoen sorginen bileren xarma, eta bertan erabakiko dute nork esango dion agur lehiaketari. 

'Arimaren Margolariak' saioa asteazkenetan izaten da ikusgai, 22:00etan, ETB1en eta eitb.eus-en.