Castillo Suarez idazlea, 15:00etan, 'Arte[faktua]' saioan

Castillo Suarez idazle altsasuarra da aste honetako gonbidatu nagusia 'Arte[faktua]'n. Ez gara elkartu, baina, bere sorterrian edo bizilekuan; Arabako Galarreta herrixkan elkartu gara Irautera poema bildumaz hitz egiteko.

Zazpi urte zeramatzan libururik argitaratu gabe, Urtebetetze festa plazaratu zuenetik. Maitasuna, giza harremanak eta denboraren igarotzea dira poeta nafar honen ohiko gaiak, bihurgunez jariotako poesia, irakurlearen sentimenduetan arakatzen duena. Naturak eta haren elementuen josketak ematen diote nortasuna poemei, iratzeen antzera irauteko helburuekin sortuak.

Euskal Filologian lizentziaduna da Castillo Suarez. Sakanako Mankomunitateko euskara teknikaria da aspaldian, eta, lan arrazoiengatik, herri batetik bestera bidaiatzera ohituta dago, eta inspirazio iturri bihurtu ditu joan-etorriak.

Garazi Kamio etorriko da 'Arte[faktua]' saiora Castillo Suarezek gonbidatuta. Kazetaria, irakaslea eta idazlea da Kamio, eta bi liburu ditu argitaratuta orain arte: Beste norbaiten zapatak, 2011n Igartza Saria irabazi zuen narrazio liburua, eta Orube abandonatuak eleberria. Lagun handia izateaz gainera, Castilloren editorea eta haren lana hobekien ezagutzen duen pertsona da Kamio, poeta nafarraren hitzetan.

Irakurlearen atalean, Arraiozko Maria Jesús Zubietak Hasier Larretxeak idatzitako El lenguaje de los bosques liburua gomendatuko digu.

Galdetegia sailean, berriz, zein libururen egile izan nahiko zukeen esango digu Katixa Agirrek; Hasier Larretxeak gehien hunkitu duen biografia zein izan den argituko digu, eta Edorta Jimenezek berriro zein liburu irakurriko lukeen azalduko du.

Ur Apalategi idazle lapurtarra izango da aste honetako Artefaktu[egileak] izeneko tartearen protagonista.

Nahia Ostaikoetxea eta Ana Martinez bizkaitarrak Unai Elorriaga idazlearen Vredaman liburuari buruz ariko dira Booktuberren atalean.

Nobedadeek, liburu-denden gomendioek, bitxiek eta epilogoak osatuko dute saioa.

'Arte[faktua]' gaur izango da ikusgai, 15:00etan, ETB1en eta eitb.eus-en.