Eider Rodriguez idazlea larunbateko "Arte[faktua]" saioan

Eider Rodriguez idazlea izango da aste honetan "Arte[faktua]" saioko gonbidatu nagusia. Susa argitaletxearekin batera, Rodriguezek lehenengo eleberria duen Eraikuntzarako materiala argitaratu du, non alkoholak blaitutako aitarekin emandako urteak kontatzen dituen. Puskaz eta hutsunez beteriko nobela honetan, egileak berea izan zen egoera familiarra nobelaren erdigunean jartzen du, behin hautatu zuen isiltasunarekin eraikitako horma hitzen bidez eraisteko. Honetaz guztiaz hitz egiteko, Oiartzungo Orialki enpresan elkartu dira egilea bera eta Yolanda Mendiola.

Annie Ernaux idazle frantsesari eskainiko diote Letren bidaiak atala. Kattalin Minerrek aukeratu du Ernaux, asko maite dituen egileen artean dagoelako, baita bere bizitzatik hartutako istorioak eta eguneroko gauza sinpleak kontatzeko duen gaitasunagatik ere.

Cruz Gartziandia irakurle iruindarraren eskutik ailegatuko da aste honetako literatura-gomendioa. Horretako, Antxiñe Mendizabalen Odolekoak (Elkar) eleberria aurkeztuko du.

Amaitzeko, Andere Garabeitia ikasleak eginiko booktubea erakutsiko du saioak. Galtzagorri elkarteak antolatutako Booktuberboom_+ lehiaketaren bosgarren edizioko irabazlea izateaz gain, publikoaren saria ere jaso zuen.

Saio honek emango dio amaiera "Arte[faktua]"ren 5. edizio honi, eta udazkenean itzuliko da euskal letren errepublikara.

"Arte[faktua]" saioa larunbat honetan izango da ikusgai 12:55ean ETB1en eta eitb.eus-en