12:50ean
Anjel Lertxundiren 'Desertuan behatxuloa' obra, larunbateko "Artefaktua" saioan
EITB Media
Urte askoren bilketa eta pentsatzeko era desberdinak irudikatzen saiatu da idazle oriotarra. Liburuak Zarauzko Photomuseum Argazki eta Zinema Museoan izango du presentzia.
Anjel Lertxundi. EITB Mediaren bideo batetik hartutako irudia
Larunbat honetan, Anjel Lertxundi elkarrizketatuko dugu "Artefaktua" saioan Desertuan behatxuloa (Alberdania) liburuaz solastatzeko. Pandemia batetik abiatu eta gerra batean amaitu, horixe da idazleak sakondu nahi izan duen testuingurua. Hainbat ideia, obsesio eta urte askoan hartutako oharrak irudikatu ditu hemen; horretarako, olatu bat izan du beti oroimenean sinbolo. Gainera, begiradaren garrantzia du mezu subliminal modura, Lertxundik argi baitu bakoitzaren ikuspuntuak alda daitezkeela begiradaren arabera. Non dago idazle baten asetasuna? Artista honek esan digunez, lanean jarraitzen du ez delako konforme geratu sortu duen guztiarekin. Honetaz guztiaz mintzatzeko, Zarauzko Photomuseum Argazki eta Zinema Museora gerturatuko da saioa idazlearekin.
Lertxundik Idoia Santamaria Urkaregi gonbidatuko du saiora; itzultzailea eta Elhuyar hiztegiaren zuzentzailea. Elkar ezagutzen dutenetik kezkak eta pozak partekatu dituztela ados daude biak; gainera, Santamariak beti izaten ditu Lertxundiren lanak inguruan bere itzulpenen errepasoa egiterakoan.
Bestalde, Ander Terrones Arellano ezagutzeko aukera izango dugu; kazetaria ogibidez eta idazlea zaletasunez.
Haritz Azurmendi irakurlearen eskutik iritsiko da aste honetako literatur gomendioa.
Guztia, saioa osatzen duten beste atalekin batera, larunbatean, arratsaldeko 12:50ean, ETB1en, eitb.eus-en eta Nahieran.